रोजगारीका लागि भारत पुगेका महोत्तरीको बर्दिबास नगरपालिका–१४ स्थित मुसहर बस्तीका बालबालिकासहित १६ जना नेपालीलाई भारतको हरियाणा राज्यमा बन्धक बनाइएका अवस्थामा उद्धार गरिएको छ । उनीहरूलाई स्वदेश फर्काउने प्रक्रिया अघि बढाइएको छ ।
आफन्त इण्डियाको सहकार्य, नयाँ दिल्लीस्थित नेपाली दूतावासको समन्वय तथा इलाका प्रहरी कार्यालय बर्दिबासको पहलमा उनीहरूको उद्धार गरिएको हो । इलाका प्रहरी कार्यालय बर्दिबासका डीएसपी गुरु प्रसाद तिमिल्सिनाका अनुसार श्रम शोषणमा परेका उनीहरूलाई उद्धार गरी नेपाल फर्काउने तयारी भइरहेको छ ।
उद्धार टोलीका सदस्य अशोक सदाका अनुसार भारतीय प्रहरीको सहयोगमा बन्धक बनाइएकाहरूलाई मुक्त गरिएको हो । काम गरेबापतको पारिश्रमिकसमेत प्रहरीको पहलमा उपलब्ध गराइएको उहाँले बताउनुभयो ।
पीडितहरूलाई डर, धम्की तथा यातना दिएर बन्धक बनाइएको बताइएको छ । उनीहरूले आफूमाथि भएको कुटपिट र यातनाका तस्बिर तथा भिडियो परिवारजनलाई पठाएपछि घटनाबारे जानकारी बाहिर आएको थियो ।
पीडितका आफन्तहरूले दोषीमाथि कानुनी कारबाही र उद्धारको माग गर्दै इलाका प्रहरी कार्यालय बर्दिबासमार्फत नेपाली दूतावासमा निवेदन दिएका थिए । वीरेन्द्र सदा, कारिचरण सदा, अशोक सदा, अमरलाल सदा र मनोहर सदाले आफ्ना छोराछोरी तथा श्रीमतीहरू बन्धक बनेको भन्दै उद्धारका लागि पहल गर्न अनुरोध गर्नुभएको थियो ।
प्रारम्भिक विवरणअनुसार उनीहरूलाई २७ मार्च २०२६ मा भारतको हरियाणा राज्यअन्तर्गत झज्जर जिल्लाको हेलन गाउँस्थित कुखुरा फार्ममा अन्डा सङ्कलन गर्ने काममा राम्रो आम्दानी हुने प्रलोभन देखाएर लगिएको थियो । तर त्यहाँ पुगेपछि उनीहरूलाई श्रम शोषण गर्दै बन्धक बनाइएको आरोप लागेको छ ।
