रोजगारीको खोजीमा भारतको हैदराबाद पुगेका खोटेहाङ गाउँपालिका– ७, खोटाङबजारस्थित भँडारेका २५ वर्षीय तिलक परियारको सवारी दुर्घटनामा मृत्यु भएको छ । होटेलमा काम गर्नका लागि साथीहरूसँगै यही चैत ५ गते हैदराबाद पुगेकै भोलिपल्ट चैत ६ गते गाडीले ठक्कर दिँदा गम्भीर घाइते भएका तिलकको उपचारको क्रममा आज (बुधबार) मृत्यु भएको हो ।
धन कमाउने सपना बोकेर हैदराबाद पुगेको हप्ता दिन नबित्दै तिलकले गाडी दुर्घटनामा ज्यान गुमाएको खबर प्राप्त भएको स्थानीय अगुवा अमरसिंह बस्नेतले जानकारी दिएका छन् । हैदराबाद गएर होटेलमा काम गर्ने भन्दै तिलक गाउँकै साथीहरू सन्तोष परियार र कृष्ण परियारको साथमा चैत २ गते घरबाट हिँडेका थिए ।
पैदल तथा गाडीको बाटो हुँदै चैत ५ गते साथीहरूसँग हैदराबाद पुगेका तिलकलाई चैत ६ गते गाडीले ठक्कर दिँदा गम्भीर घाइते भएका थिए । पैदल यात्रा गरेर सडक पार गर्ने क्रममा तिलकलाई गाडीले ठक्कर दिएको साथीहरूले बताएका छन् ।
दुर्घटनालगत्तै गान्धी अस्पताल, सेकन्दराबादमा भर्ना गरेर उपचार गर्ने क्रममा चैत ११ गते बिहान तिलकको मृत्यु भएको हैदराबादमा रहेका आफन्तले जानकारी दिएका छन् । कमजोर आर्थिक अवस्थाका तिलक र सन्तोष निर्वाचन प्रहरीको जिम्मेवारी सम्पन्न गरेर घर फर्किएपछि हैदराबादतर्फ गएको पारिवारिक स्रोतले बताएकाे छ ।
स्थानीयले दिएको जानकारीअनुसार मृतक तिलक घरका दुई छोरामध्ये कान्छो छोरा हुन् । उनीहरूका पाँचजना दिदीबहिनी रहेका छन् । श्रीमतीसँग अलग्गिएर बसेका मृतक तिलकका पाँच वर्षका एक छोरा छन् ।
हैदराबादतर्फ हिँडेकै दिन तिलकको घर हावाहुरीले उठाएर परिवारको बिचल्ली बनाइदिएको स्थानीयले बताएका छन् । मृतक तिलक, सन्तोष र कृष्णसँगै रोजगारी दिलाउने भन्दै भारत लैजाने ठेकेदार पछ्याउँदै हैदराबाद पुगेको बुझिएको छ ।
धन कमाउन भारत गएको छोराको गाडी दुर्घटनामा परेर हप्ता दिन नबित्दै मृत्यु भएको खबर आएपछि परिवार शोकमा डुबेकाे छ । खोटेहाङ गाउँपालिकासँगै दक्षिणी क्षेत्रमा पर्ने स्थानीय तहबाट बर्सेनि दर्जनौँ युवा रोजगारीको खोजीमा भारत जाने गरेका छन् ।
गत माघ २२ गते भारतको मेघालयस्थित कोइलाखानीमा विस्फाेट हुँदा खोटाङका चारजनाले ज्यान गुमाएका थिए । मेघालयस्थित अवैध कोइलाखानीमा भएको विस्फाेटमा परेर बराहपोखरी गाउँपालिका– १, बरापोखरीस्थित भन्ज्याङका २७ वर्षीय पूर्णिराम खपाङ्गी मगर, २४ वर्षीय सुरेन्द्र खपाङ्गी मगर, ३५ वर्षीय नरबहादुर खपाङ्गी मगर र हलेसी तुवाचुङ नगरपालिका– ५, दुर्छिमका ५० वर्षीय रत्न राईको मृत्यु भएको हो ।
विस्फाेटमा गम्भीर घाइते भएका नेपालका चारजनाको सिलोङस्थित नीलग्रिन हस्पिटल (अस्पताल)मा उपचार भइरहेको घटनास्थल पुगेका मृतकका आफन्त प्रकाश खपाङ्गी मगरले जानकारी दिएका छन् । बराहपोखरी गाउँपालिका– १, सालघारीका ४७ वर्षीय कर्णबहादुर मगर र भन्ज्याङका ४० वर्षीय बमबहादुर मगर, दिक्तेल रूपाकोट मझुवागढी नगरपालिका– २, मुडेका ४८ वर्षीय दावा शेर्पा तथा छिमेकी जिल्ला उदयपुरको त्रियुगा नगरपालिका– १४, साउनेका ललितबहादुर मगरको उपचार भइरहेको हो ।
दुर्घटनाका मृतक परिवारलाई सम्बन्धित स्थानीय तहले आर्थिक सहयोग उपलब्ध गराएको छ । बराहपोखरी गाउँपालिका र हलेसी तुवाचुङ नगरपालिकाले रु. ५०–५० हजार आर्थिक सहयोग उपलब्ध गराएको हो ।
