मलेसियामा वैदेशिक रोजगारीका लागि सीमित म्यानपावरबाट मात्रै नेपाली श्रमिक आपूर्ति गर्ने नीति जारी भएकोप्रति प्रधानमन्त्री बालेन्द्र शाहले मलेसियाका समकक्षी इब्राहिमसँग टेलिफोन वार्ता गरेका छन् । मंगलबार बिहान भएको वार्तामा प्रधानमन्त्री शाहले नेपाल र मलेसियाबिच वैदेशिक रोजगारीलाई मर्यादित, पारदर्शी र शोषणमुक्त बनाउने विषयमा छलफल गरेको सचिवालयले जनाएको छ ।
प्रधानमन्त्री शाहले मलेसियाको रोजगारीका क्षेत्रमा रहेको सिन्डिकेट तथा बिचौलिया प्रथा आफू र आफ्नो सरकारलाई मन नपरेको विषय मलेसियाली समकक्षीसँग स्पष्ट रूपमा राखेको पनि सचिवालयको प्रेसनोटमा उल्लेख छ । प्रधानमन्त्री शाहले व्यक्त गरेको धारणालाई सकारात्मक रूपमा लिई मलेसियाका प्रधानमन्त्री इब्राहिमले पनि आफू सिन्डिकेट र बिचौलिया प्रथाको विरुद्धमा रहेको बताएका थिए । उनले यस विषयमा आफ्ना श्रममन्त्रीलाई तत्कालै नेपालका श्रममन्त्रीसँग समन्वय गरी काम अघि बढाउन निर्देशन दिने प्रतिबद्धतासमेत व्यक्त गरेका थिए ।
दुवै देशका प्रधानमन्त्रीस्तरमा भएको छलफलबाट म्यानपावर व्यवसायी भने उत्साहित छन् । वैदेशिक रोजगार व्यवसायी संघ अध्यक्ष डिकबहादुर खत्रीले प्रधानमन्त्रीस्तरमा भएको छलफलले निकै खुसी दिएको बताए । उनले भने, ‘श्रम सम्झौताका सबै बुँदालाई पालना गर्नु दुवै देशको दायित्व भएको कुरा पनि स्मरण गराउन चाहन्छु ।’
