नेपाली नागरिकलाई नक्कली भुटानी शरणार्थी बनाएर अमेरिका पठाउने नाममा भएको करोडौं ठगीकै शैलीमा अहिले इजरायल पठाउने भन्दै ठगी भएको खुलेको छ ।
प्रहरीको केन्द्रीय अनुसन्धान ब्युरो (सीआईबी)ले गरेको अनुसन्धानका क्रममा भुटानी शरणार्थी प्रकरणकै जस्तो शैली अपनाएर नक्कली कागजात बनाई ठगी भएको खुलेको हो ।
भुटानी शरणार्थी समस्या समाधानका लागि भन्दै तत्कालीन गृहमन्त्री रामबहादुर थापा ‘बादल’को पालामा ३० जेठ २०७६ मा कार्यदल बनाइएको थियो । गृह मन्त्रालयका पूर्वसहसचिव बालकृष्ण पन्थीको संयोजकत्व गठित कार्यदलमा विज्ञको रूपमा गणेशबहादुर केसी र सदस्यसचिवको रूपमा गृहका तत्कालीन शाखा अधिकृत दीपकप्रसाद न्यौपाने थिए ।
पन्थी कार्यदलको प्रतिवेदनमा अनसूची नै थपेर नक्कली नाम राख्दै अमेरिका लैजाने भनेर ठगी भएको उल्लेख थियो । ठिक यस्तै शैलीमा मन्त्रिपरिषद्को निर्णय भन्दै नक्कली कागजात बनाएर विश्वास दिलाउँदै ठगी गरेको सीआईबीका एक अनुसन्धान अधिकृतले बताए ।
अहिले पक्राउ परेकामध्ये शिवराम श्रेष्ठ र ज्ञानबहादुर कार्की त्यही नक्कली कागजात बनाउने व्यक्ति रहेको सीआईबीका ती अधिकारीले बताए । ‘उहाँहरू दुई जनाको आरोप मन्त्रिपरिषद्को निर्णय भन्दै नक्कली कागजात बनाएको भन्ने छ । उहाँहरूलाई मुलपानी क्षेत्रबाट पक्राउ गरी अनुसन्धान गरेका छौं,’ ती अनुसन्धान अधिकृतले भने ।
शिवराम र ज्ञानबहादुरले भारतीय मुलको जस्तो देखिने व्यक्तिले मन्त्रिपरिषद्को निर्णय जस्तो देखिने कागजात बनाउन लगाएको प्रहरीसमक्ष बयान दिएका छन् । उनीहरूले नक्कली कागजात बनाए वापत केही रकम बुझेको आरोप छ ।
नेपाल सरकार र इजरायल सरकारबीच जीटुजी (सरकार टु सरकारबीच) सम्झौता भएर वैदेशिक रोजगारीमा नेपालबाट केयर गिभरमा इजरायल पठाइँदै आएको छ । नेपाल सरकारले सन् २०२४ मा लिएको परीक्षामा सम्मिलितमध्ये १५६ जनालाई मन्त्रिपरिषद्बाट विशेष निर्णय गराएर लैजाने भन्दै उनीहरूले रकम लिएर ठगी गरेको आरोप छ ।
यो समूहले मन्त्रिपरिषद्को नक्कली कागजात बनाएर विश्वास दिलाउनेदेखि प्रधानमन्त्रीका प्रमुख सल्लाहाकारको नाम लिँदै प्रतिव्यक्ति ६ लाख २० हजार रुपैयाँ लिएर इजरायल पठाउने भन्दै रकम उठाएको बताइएको छ ।
सुरुमा यो ठगीको उजुरी विमल पराजुलीको नामबाट हेलो सरकारमा परेको थियो । हेलो सरकारको च.नं. १५८० को पत्रमार्फत सीआईबी आएको थियो । सन् २०२४ मा सञ्चालित केयर गिभरको परीक्षामा ३ हजार ४६१ जना परीक्षार्थीहरू उत्तीर्ण भएका थिए ।
प्रतीक्षा सूचीमा रहेकालाई यो समूहले मन्त्रिपरिषद्को निर्णय भन्दै विश्वास दिलाउन नक्कली कागजात देखाउने, प्रधानमन्त्रीका प्रमुख सल्लाहकारको नाम लिँदै विश्वासमा दिलाउने गरेको बताइन्छ ।
प्रतीक्षा सूचीमा रहेका १ हजार १५२ जनामध्ये १५६ जनालाई क्याबिनेटबाट विशेष निर्णय गराई तत्काल इजरायल पठाउने भन्दै त्यसको नक्कली कागजात बनाएर विश्वास दिलाएका थिए ।
यसरी नक्कली कागजात नै बनाएर भुटानी शरणार्थीकै जस्तो शैलीमा अहिले अर्को ठगी भएको सीआईबीका अधिकारीहरू बताउँछन् ।
कांग्रेस केन्द्रीय सदस्य उम्मेदवार विनिता खड्काविरुद्ध पनि उजुरी परेको थियो । तर, प्रमाण जुटेपछि मात्रै उनलाई पक्राउ गरिएको सीआईबीले बताएको छ । ‘अहिले पक्राउ परेकी खड्काविरुद्ध सुरुमा उजुरी परेको थियो । तर, अनुसन्धानका क्रममा प्रमाण भेटिएपछि बल्ल पक्राउ गरेर अनुसन्धान अघि बढाएका हौं,’ सीआईबीका एक अधिकारी भन्छन्, ‘खड्का र कांग्रेसकै अर्का नेता चौलागाईंबीच इजरायल प्रकरणमा कनेक्सन देखिएको छ ।’
यद्यपि, खड्कालाई सोमबार काठमाडौं जिल्ला अदालतले थुना बाहिरै राखेर अनुसन्धान गर्न आदेश गरेको छ । चौलागाईंलाई भने प्रहरीले सुरुमै पक्राउ गरेको थियो ।
यो समूहले पक्राउ पर्नुभन्दा ४/५ दिनअघि मात्रै रकम बुझेको खुलेको छ । रकम बुझ्ने मुख्य व्यक्ति भने बालिका खड्का रहेको प्रहरीले बताएको छ । उनी मुख्यगरी पीडितसँग जोडिएर काम गर्ने र बाँकी भने बालिकासँग कनेक्सन बनाएर काम गर्ने व्यक्तिहरू हुन् ।
एकै व्यक्तिबाट साढे २ करोड ठगी
प्रहरीले गरेको अहिलेसम्मको अनुसन्धानअनुसार एकै व्यक्तिबाट साढे दुई करोडसम्म ठगी गरेको पाइएको छ । ती व्यक्तिले भने विभिन्न व्यक्तिलाई सम्पर्क गरी इजरायल जानका लागि रकम उठाएको र अहिले पक्राउ परेको गिरोहलाई बुझाएका थिए ।
तर, उनीहरू सबै अहिले अलपत्र परेका छन् । अहिलेसम्म २२ जनाले सीआईबीमा उजुरी दिएका छिन् । २२ जनाबाट साढे ६ करोड ठगी भएको उजुरी आएको सीआईबीका प्रवक्ता तथा एसएसपी अनुपमशमशेर जबराले बताए ।
‘अहिलेसम्म ठगिएको भन्दै २२ जनाले उजुरी दिनुभएको छ । यो संख्या अझै बढ्न सक्छ,’ प्रवक्ता जबरा भन्छन् ।
त्यस्तै सीआईबीले पनि सूचना नै निकालेर कोही पीडित भए सम्पर्क आउन तथा उजुरी दिन आह्वान नै गरेको छ ।
५ जना पक्राउ
यो प्रकरणमा सीआईबीले सुरुमा दुई जनालाई पक्राउ गरेको थियो । १ असोजमा सीआईबीले रामेछापको सुनापति गाउँपालिका–१ घर भएका ५९ वर्षीय भरत चौलागार्इं र दोलखाको कालिञ्चोक गाउँपालिका–८ कि ३२ वर्षीया बालिका शिवाकोटी पक्राउ परेका थिए ।
उनीहरूविरुद्ध सुरुमा प्रहरीले काठमाडौं जिल्ला अदालतबाट ठगीसम्बन्धी कसुरमा म्याद लिएर अनुसन्धान गरेको थियो ।
त्यसपछि मुलपानी क्षेत्रबाट ज्ञानबहादुर कार्की र शिवराम श्रेष्ठ पक्राउ परेका थिए । पछिल्लो पटक भने कांग्रेस केन्द्रीय सदस्य उम्मेदवारसमेत रहेकी विनिता खड्का पक्राउ परेकी हुन् ।
संगठितमा अनुसन्धान
सुरुमा ठगीको कसुरमा अनुसन्धान गरेको प्रहरीले त्यसपछि ठगीसँगै आपराधिक लाभको कसुरमा पनि म्याद लिएर अनुसन्धान गरेको थियो ।
तर, अहिले संगठित अपराधको कसुरमा पनि म्याद लिएर अनुसन्धान अघि बढाइएको सीआईबीले बताएको छ ।
सुरुमा दुई जनालाई पक्राउ गरेर अनुसन्धान गरेको प्रहरीले अनुसन्धानको क्रममा थप व्यक्तिको संलग्नता खुलेको र संगठित रूपमा काम गरेको देखिएपछि संगठित अपराधको कसुर पनि लगाएको हो ।
संगठित अपराधको कसुर लगाएसँगै ६० दिनसम्म हिरासतमा राखेर अनुसन्धान गर्ने सुविधा प्रहरीलाई हुन्छ ।
