उत्तरी कुवेतमा गत बिहीबार भएको आक्रमणमा परी निधन भएका तेह्रथुमनिवासी नेपाली नागरिक सोमकुमार तामाङको पार्थिव शरीर आज कुवेत एयरवेजमार्फत नेपाल ल्याइँदै छ।
यस दुःखद घटनाप्रति नेपाल सरकारले गहिरो दुःख व्यक्त गर्दै शोकसन्तप्त परिवारप्रति हार्दिक समवेदना प्रकट गरेको छ। सरकारले दिवंगत तामाङको परिवारजनलाई आवश्यक सहयोग उपलब्ध गराउने प्रतिबद्धतासमेत जनाएको छ।
कुवेतस्थित नेपाली राजदूतावासले स्थानीय निकाय तथा सम्बन्धित कम्पनीसँग आवश्यक समन्वय गरी पार्थिव शरीर स्वदेश पठाउने सम्पूर्ण प्रक्रिया सम्पन्न गरेको जनाएको छ। परराष्ट्र मन्त्रालयका अनुसार विदेशमा रहेका नेपाली नागरिकको सुरक्षा तथा हित संरक्षण सरकारको प्राथमिकतामा रहेको उल्लेख गर्दै यस घटनासँग सम्बन्धित आवश्यक कूटनीतिक समन्वय निरन्तर भइरहेको छ।
