इजरायलका दीर्घकालीन स्याहार केन्द्र (केयरगिभर) मा सहायक श्रमिकका रूपमा काममा जानका लागि दुई हजार तीन सय जना नेपाली श्रमिक माग भएको छ । नेपाल र इजरायल सरकारबिच भएको श्रम सम्झौता अनुसार इजरायलमा केयरगिभरमा सहायक श्रमिकका रूपमा कार्य गर्न इच्छुक नेपाली नागरिकका लागि आवेदन माग गरेको हो ।
विभागका अनुसार तेस्रो चरणमा इजरायल केयरगिभरमा जान माग गरिएको कोटामा कुल सङ्ख्याको ६० प्रतिशत महिला र ४० प्रतिशत पुरुष छनोट गरिने छ । छनोट भएका श्रमिकले इजरायलमा मासिक छ हजार ४४३.८५ इजरायली सेकेल (करिब तीन लाख ४७ हजार रुपियाँ) तलब पाउने उल्लेख छ । यसबाहेक ओभरटाइम, वार्षिक बिदा, खाना तथा बसोबाससम्बन्धी सुविधा पनि उपलब्ध हुने इजरायलले जनाएको छ । सम्झौताबमोजिम सुरुमा एक वर्षको रहने र बढीमा पाँच वर्षसम्म थप गर्न सकिने उल्लेख छ ।
२०७७ असोज १४ गते इजरायलका लागि नेपाली राजदूत र इजरायलका परराष्ट्र मन्त्रायलबिच श्रम सम्झौता नेपाली श्रमिक इजरायल पठाउने विषयमा सम्झौता सम्पन्न भएको थियो । हालको युवा, श्रम तथा रोजगार मन्त्रालय र साबिकको श्रम, रोजगार तथा सामाजिक सुरक्षा मन्त्रालयले इजरायलमा नेपाली दक्ष श्रमिक पठाउनेसम्बन्धी निर्देशिका, २०७८ जारी गरिसकेको छ ।
उक्त निर्देशिकामा गरिएको व्यवस्था भए अनुसार इजरायल रोजगारीमा जाँदा लाग्ने आवश्यक शुल्क रोजगारदाताले नबेहोरेको खण्डमा स्वयम् श्रमिक आफैँले बेहोर्नुपर्ने व्यवस्था गरिएको छ । जबकि नेपाल र इजरायल सरकारबिच भएको सम्झौतामा नेपाली नागरिकलाई रोजगारीका लागि इजरायल पठाउँदा लाग्ने हवाई भाडा, बिमा, स्वास्थ्य परीक्षण, कल्याणकारी कोषको रकम र श्रम स्वीकृति लिँदा लाग्ने खर्च रोजगारदाताले बेहोर्ने उल्लेख छ ।
