मलेसिया सरकारले दुई देशबीच सम्पन्न श्रम सम्झौताबमोजिम नेपालमा बायो मेडिकल प्रणाली (बीएमएस) मार्फत सञ्चालन गर्न नियुक्त गरिएको ३६ वटा स्वास्थ्य संस्थाबाट नेपाली श्रमिकको स्वास्थ्य परीक्षण र तोकिएको सेवा शुल्क संकलन भइरहेको स्पष्ट पारेको छ ।
काठमाडौंस्थित मलेसियन दूतावासले सोमबार सार्वजनिक सूचना जारी गर्दै १२ कार्तिक २०७५ मा नेपाल र मलेसिया सरकारबीच श्रमिकको भर्ना, रोजगारी तथा स्वदेश फिर्तासम्बन्धी सम्झौतालाई पुनः स्मरण गराउँदै स्वास्थ्य परीक्षण प्रणालीबारे स्पष्ट पारेको हो ।
‘सम्झौतामा मलेसिया जाने नेपाली श्रमिकको स्वास्थ्य परीक्षण बायो–मेडिकल प्रणाली (बीएमएस) मार्फत सञ्चालन गर्न ३६ वटा स्वास्थ्य संस्थालाई नियुक्त गरिएको उल्लेख गरिएको थियो । यस प्रयोजनका लागि नेपाल सरकारले तोकेको शुल्कबाहेक मलेसिया सरकारले थप सेवा शुल्कबापत ३ हजार रुपैयाँ निर्धारण गरेको थियो,’ दूतावासको सूचनामा उल्लेख छ,‘उक्त सम्झौतामा बायो–मेडिकल प्रणालीसम्बन्धी खर्च रोजगारदाताले व्यहोर्ने स्पष्ट व्यवस्था गरेको थियो ।’ जुन खर्च मलेसियन रोजगारदाताले पहिलो पहिनाको तलबमा फिर्ता गर्ने व्यवस्था छ ।
३६ वटा स्वास्थ्य संस्थाले नेपालमा मलेसियाको स्वास्थ्य प्रोटोकल (एसओपी) अनुसार स्वास्थ्य परीक्षण गर्नुपर्ने व्यवस्था गरेको हो । श्रम, रोजगार तथा सामाजिक सुरक्षा मन्त्रालयले स्वास्थ्य परीक्षणका लागि ६ हजार ५ सय रुपैयाँ निर्धारण गरेको छ । यसबाहेक थप ३ हजार रुपैयाँ बायो–मेडिकल प्रणाली प्रयोग गरेबापत सेवा शुल्क लिन पाउने व्यवस्था गरेको थियो ।
दूतावासले श्रम सम्झौतामा उल्लेख भएबमोजिम नेपालमा बायो मेडिकल प्रणालीलाई कार्यान्वयन गर्न म्याक्रो टेक प्रालि तथा वेस्टिनेट एसडिएन बीएचडीलाई कानुनी अधिकार दिइएको जनाएको छ ।
‘म्याक्रो टेक प्रालि र वेस्टिनेट एसडीएन बीएचडीलाई नेपालमा बायोमेडिकल कार्यान्वयन गर्ने, शुल्क संकलन गर्ने तथा कानुनबमोजिम रकम पठाउने अधिकारसमेत प्रदान गरिएको थियो,’ दूतावासको सूचनामा उल्लेख छ,‘म्याक्रो टेक प्रालि तथा वेस्टिनेट एसडीएन बीएचडीलाई दुवैले नेपाल र मलेसिया सरकारबीच भएको सहमतिअनुसार आफ्नो काम सञ्चालन गरिरहेको छ ।’
मलेसियासहित प्रमुख गन्तव्य देशले आफ्नो स्वास्थ्य प्रोटोकल (एसओपी) बमोजिमको मापदण्ड पूरा गर्न सक्ने सूचीकृत स्वास्थ्य संस्थाबाट छानिएको मेडिकलबाट दिइएको मेडिकल रिपोर्ट पेस गरेपछि मात्रै श्रम भिसा आउने गरेको छ ।
गल्फ कोआपेरसन काउन्सिल (जीसीसी)ले साउदी अरब, बहराइन र ओमान जाने श्रमिकको स्वास्थ्य परीक्षण गर्न ३१ वटा मेडिकल पुर्याएको छ । कतार एउटा, इजरायल ५ र दक्षिण कोरियाका लागि ४ वटा स्वास्थ्य संस्थालाई अनुमति दिइएको छ ।
