निर्वाचन आयोगमा नियुक्तिका लागि सिफारिस प्रमुख निर्वाचन आयुक्त तथा निर्वाचन आयुक्तले विदेशबाट हुने मतदान तथा अन्तरजिल्ला मताधिकारको व्यवस्थालाई प्राथमिकतामा राखेर आफ्नो कार्ययोजना संसदीय सुनुवाइ समितिसमक्ष पेस गरेका छन् । प्रस्तावित प्रमुख निर्वाचन आयुक्त मानबहादुर कार्की तथा प्रस्तावित आयुक्तद्वय डा. राजीव सुब्बा र गुरुप्रसाद वाग्लेले मूलभूत विषयमा समान धारणासहितको कार्ययोजना सुनुवाइ समितिमा पेस गर्नुभएको हो । कार्की र वाग्लेले अगाडि सार्नुभएका धेरै विषय समान छन् । सुब्बाको कार्ययोजना सूचना प्रविधिको उपयोगको सुनिश्चितता र सुरक्षाका विषयमा समेत थप केन्द्रित छ ।
प्रस्तावित पदाधिकारीले साउन ४ गते नै आफ्नो कार्ययोजना पेस गर्नुभएको छ । समितिमा प्रस्तावित आयुक्तद्वय सुब्बा र वाग्लेको सुनुवाइ साउन १२ र कार्कीको सुनुवाइ १३ गते हुने गरी कार्यतालिका तय भएको छ । कार्ययोजनामा प्रस्तावित प्रमुख निर्वाचन आयुक्त कार्कीले विदेशमा रहेका नेपाली र अन्तरजिल्लाको मताधिकार तथा उम्मेदवार अस्वीकारको विकल्पको कानुन निर्माण र कार्यान्वयन कार्यभार भएको उल्लेख गर्नुभएको छ ।
सूचना प्रविधि प्रयोगको नीति
विदेशमा रहेका र अन्तरजिल्ला निर्वाचनको उपयुक्त विधि छनोट गरी कार्यान्वयन गर्ने सुब्बाको कार्ययोजनामा उल्लेख छ । आयुक्तका रूपमा छ वर्षमा आफूले गर्ने कामको सङ्क्षिप्त विवरण पनि कार्ययोजनामा उहाँले समावेश गर्नुभएको छ । वार्षिक रूपमा गर्ने काम, सरोकारवाला निकाय र अपेक्षित उपलब्धिलगायतका विवरण कार्ययोजनामा उल्लेख छ ।
चुनाव नलडे दल खारेज
वाग्लेले पनि निर्वाचनमा विदेशमा रहेका मतदाताको मताधिकार, अन्तरजिल्ला मताधिकार, सूचना प्रविधि प्रयोग, मौजुदा कानुनको सुधारलगायतलाई नै कार्ययोजनामा समेट्नुभएको छ । निर्वाचनमा विद्युतीय मेसिनको प्रयोग र इन्टरनेट भोटिङको सम्भाव्यता अध्ययन र कार्यान्वयनको प्रतिबद्धता जनाउनुभएको छ ।
