अरिष्मा मोक्तान
साउदी अरब रोजगारदाताले कम्पनीमा बसिरहेका नेपाली कामदारहरूलाई सप्लाई कम्पनीको आवासमा बस्न आग्रह गर्दै अलपत्र पारेकाे घटना सार्वजनिक हुन थालेका छन् । पछिल्ला केही दिनयता विभिन्न स्थानमा रहेका नेपाली कामदारहरूलाई आफू बसिरहेको आवास खाली गरी सप्लाई कम्पनीको आवासमा जाऊ भनेकै भरमा आफ्ना आवास छोडेको पाइएको साउदी अरबस्थित नेपाली दूतावासले जनाएको छ ।
कम्पनीको आवास छोड्ने र सप्लाई कम्पनीको आवासमा प्रवेश नदिने गरेका कारण बीचैमा अलपत्र पर्ने गरेको राजदूतावासले जनाएको छ । कम्पनीमा बसिरहेको आवासबाहेक अन्यन्त्र कहीँ कतै सजिलै बस्न नपाइने र संक्रमणको जोखिम झनै बढ्ने भएकाले कुनै बहानामा आवासबाहिर निकाल्न खोजिएमा स्वीकार नगर्न र आवास नछोड्न राजदूतावासले आग्रह गरेको छ ।
संकटको अवस्थामा कसैलाई पनि आवासबाट बाहिर निकाल्न नपाइने भएकाले कसैले जबर्जस्ती गरेमा जबर्जस्ती गर्नेको टेलिफोन नम्बर र आफ्नो विवरणसहित नजिकको प्रहरी कार्यालय वा मानव संसाधन तथा सामाजिक विकास मन्त्रालयमा सम्पर्क गर्न राजदूतावासले आग्रह गरेकाे छ । साथै, सेवाग्राही नम्बर १९९११ व नेपाली राजदूतावास रियाद वा जेद्दास्थित महावाणिज्यदूतावासमा सम्पर्क गर्न अनुरोध गरिएकाे छ ।
साथै, रोजगारीका क्रममा विविध समस्या राख्दै नेपाली राजदूतावासमा टेलिफोन, ह्वाट्सएप, इमेलबाट सम्पर्क गर्दा आफ्नो नाम, जिल्ला, अकामा नम्बर, कार्यरत कम्पनीको नाम, कफिल वा म्यानेजर (जो समस्याका सम्बन्धमा जानकार छ) को नाम र नम्बर, नेपालको म्यानपावर कम्पनीको नाम र नम्बर, कार्य गरेको अवधि, हालको समस्या र उपलब्ध भएसम्म त्यहाँ कार्यरत भई समस्यामा परेका नेपालीको संख्यालगायतका विषयमा तथ्यपरक विवरणहरू उपलब्ध गराउन राजदूतावासले अनुरोध गरेकाे छ ।
हालसम्म साउदीमा १० हजार चार सय ८४ जना कोरोनाबाट संक्रमित भएका छन् भने एक सय तीनजनाको मृत्यु भएको छ । साथै, एक हजार चार सय ९० जना स्वास्थ्यलाभ गरी घर फर्केका छन् । संक्रमण हुनेमध्ये विदेशी नागरिकहरू ७३ प्रतिशत र साउदी नागरिक २७ प्रतिशत रहेका छन् ।
