रुद्र खड्का
आफू मातहतका कर्मचारीलाई मेनपावर व्यवसायीसँग घुस माग्न लगाएको आरोपमा वैदेशिक रोजगार विभागका महानिर्देशक विश्वराज पाण्डेलाई अख्तियार दुरुपयोग अनुसन्धान आयोगले पक्राउ गरेको छ ।
आयोग टोलीले मेनपावर सञ्चालकबाट १० लाख रुपैयाँ घुस लिन कर्मचारी पठाएको आरोपमा महानिर्देशक पाण्डेलाई चावहिलस्थित उनकै घरबाट बुधबार पक्राउ गरेको हो । अख्तियारले एसआरएस ओभरसिज सञ्चालिका सुभद्रादेवी बरालसँग १० लाख रुपैयाँ घुस माग्ने विभागका शाखा अधिकृत कृतिबल्लभ पौडेल र नायबसुब्बा खड्गबहादुर केसीलाई रकमसहित मंगलबार पक्राउ गरेको थियो । पक्राउ यी दुई कर्मचारीले महानिर्देशकले निर्देशन दिएकाले पैसा लिन गएको बयान दिएपछि पाण्डेलाई पनि पक्राउ गरिएको हो । पाण्डेमाथि गोप्य तबरबाट करिब २ सय नयाँ मेनपावर कम्पनीलाई दर्ता गर्न स्वीकृति दिएको र त्यसबापत प्रत्येकबाट २ देखि ५ लाख रुपैयाँ असुली गरेको आरोप लाग्दै आएको थियो ।
एसआरएस सञ्चालिका बरालले आफ्नो कम्पनीको रोक्का भएको कारोबार खुला गर्न विभागका कर्मचारीले १० लाख रुपैयाँ मागेको रेकर्डिङ अख्तियारलाई उपलब्ध गराएपछि अनुसन्धान थालिएको थियो । अख्तियारको निर्देशनअनुसार बरालले विभागका दुई कर्मचारीलाई १० लाख रुपैयाँ घुस दिँदै गर्दा अख्तियार टोलीले उनीहरूलाई नगदसहित नयाँ बानेश्वरस्थित इन्द्रेनी फुडल्यान्डबाट पक्राउ गरेको थियो ।
विभागका कर्मचारीलाई घुस दिने उक्त मेनपावर ५२ जना नेपाली कामदारलाई अलपत्र पार्ने कम्पनी हो । संयुक्त अरब इमिरेट्सको हुमा कम्पनीमा सुरक्षागार्डका लागि प्रतिव्यक्ति आठ लाख रुपैयाँसम्म लिएर सो कम्पनीले पठाएका नेपाली अलपत्र परेपछि विभागमा उजुरी परेको थियो । एकैचोटि ५२ जना पीडितले उजुरी दिएपछि दबाब थेग्न नसकेको विभागले एसआरएस ओभरसिजको कारोबार रोक्का गरेको थियो । कारोबार रोक्का नगरिदिन हारगुहार गरेकी बरालले जोरबल नचलेपछि पीडितलाई क्षतिपूर्ति दिने प्रतिबद्धता जनाएकी थिइन् । प्रतिबद्धताअनुसार पीडितले क्षतिपूर्ति नपाएपछि उक्त मेनपावरविरुद्ध आक्रोश बढेको थियो ।
विभागले उक्त ओभरसिजको कारोबार रोक्का गरेपछि बराल सर्वोच्च अदालतबाट कारोबार नरोक्न जारी अन्तरिम आदेश लिएर केही दिनअघि विभाग पुगेकी थिइन् । तर, विभागका कर्मचारीले पीडितको उजुरी नटुंगेको भन्दै कारोबार फुक्का गर्न आनाकानी गरिरहेका थिए । पछि मेनपावर सञ्चालिका बराल र विभागका कर्मचारीबीच १० लाख रुपैयाँ लिएर कारोबार फुक्का गर्ने सहमति भएको स्रोतको भनाइ छ । विभागका कर्मचारीलाई १० लाख रुपैयाँ घुस दिन राजी भएकी बरालले सोही समयमा अख्तियार टोलीलाई खबर गरेकी थिइन् ।
डेढ वर्षमा पाँच अधिकृत पक्राउ
घुस लिएको आरोपमा डेढ वर्षयता वैदेशिक रोजगार विभागका पाँच कर्मचारी पक्राउ परेका छन् । १६ महिनाअघि लेखाअधिकृत प्रकाश आचार्य सेवाग्राहीसँग १० हजार रुपैयाँ घुस लिएको आरोपमा अख्तियार टोलीबाट पक्राउ परेका थिए । त्यसको केही महिना बित्न नपाउँदै अर्का अधिकृत रमेश लामिछाने सात लाख रुपैयाँ घुस लिँदालिँदै रंगेहात पक्राउ परेका थिए ।
विभागका सहसचिव तहका कर्मचारी घुस प्रकरणमा भने यसअघि पक्राउ परेका थिएनन् । महानिर्देशक पाण्डे पक्राउ परेपछि विभागका कतिपय कर्मचारीले काम गर्न गाह्रो र लाजमर्दो भएको गुनासो गरिरहेका छन् । विभागका निर्देशक मोहन अधिकारीले बुधबारको घटनाले एक्लो महसुस भइरहेको र जसले गर्दा काम हुननसकेको बताए । कतिपय कर्मचारी सार्वजनिक स्थलमा वैदेशिक रोजगार विभागमा काम गर्छु भनेर परिचय दिन पनि लाजमर्दो भएको बताउँछन् ।
श्रम तथा रोजगार मन्त्रालयका सचिव लक्ष्मण मैनालीले विभागका महानिर्देशक पक्राउको घटना सञ्चार माध्यमबाट सुनेको तर वास्तविक कारण थाहा नपाएको बताए । ‘आज (बुधबार) म चितवनमा आप्रवासनसम्बन्धी एक कार्यक्रममा सहभागी छु । महानिर्देशक पक्राउको घटनाबारे विस्तृत जानकारी छैन,’ मैनालीले भने । विभागका कर्मचारीलाई घुस लिन बोलाएर पक्राउ गराएकी बरालसँग पटकपटक सम्पर्क गर्न खोज्दा मोबाइल स्विच अफ गरिएको पाइयो ।
