वैदेशिक रोजगार विभागले इजरायलको जनसंख्या तथा अध्यागमन निकाय (पीबा) प्रमुख मोत्से नाकासु तथा नेपालका लागि इजरायली राजदूत बेनी ओमेरसँग नेपाली कामदारको कोटा बढाउने विषयमा छलफल गरेको छ ।
इजरायलको पीबा संस्थाका प्रमुख मोत्से नाकासु दुई दिने दिने भ्रमणका लागि नेपालमा छन् । इजरायलले नेपालबाट वार्षिक करीव पाँच सय नेपाली कामदार लैजाने बारेमा चासो देखाएपछि त्यसैमा केन्द्रीत रहेर छलफल भएको विगका महानिर्देशक भुवन आचार्यले मध्यान्ह राष्ट्रिय दैनिकलाई जानकारी दिए ।
छलफलमा नेपाली पक्षले पाईलट प्रोजेक्ट अन्तरगत हालको कामदार छनोट प्रक्रियामा रहेका केही प्राविधिक पक्षमा सुधार हुनुपर्ने धारणा राखेको छ । केयर गिभरमा इजरायल जान आवेदन दिएकाहरु मध्येबाट योग्य भन्दा चिठ्ठामार्फत आकस्मिक शैलीमा छनोट गरेर परीक्षा लिइएको थियो । त्यसमा तत्कालीन मन्त्री सूर्यमान गुरुङ समेतले इजरायली राजदूत समक्ष असन्तुष्टि जनाएका थिए । मंगलबारको छलफलमा पनि यस विषयलाई उठाई आवदेन बुझाएका सबैको भाषा परीक्षा लिन प्रस्ताव गरिएको महानिर्देशक आचार्यले बताए । त्यस विषयमा इजरायली पक्षले ठोस जवाफ दिएको छैन ।
इजरायल जान नेपाली कामदारले स्वास्थ्य परीक्षण, बीमा, हवाई खर्चलगायत गरी लगभग ९ सय ५० डलर मात्रै तिर्न पर्छ । तर इजरायली पक्षले आगामी दिनमा कामदारको लागत बढ्न सक्ने संकेत दिएको छ । के–के विषयमा बढाउन थालिएको हो त्यस विषयमा भने इजरायली पक्षले ठोस खाका प्रस्तुत गरेको छैन । अर्को छलफल केही समय पछि हुने भनिएपनि समय तालिका भने निर्धारित हुन नसकेको बताइएको छ ।
