तीन वर्ष अस्ट्रेलियामा अध्ययनसँगै रोजगारी गरेर स्वदेश फर्किनुभएका दाङको घोराही उपमहानगरपालिका–९, अस्पाराका समीर अधिकारीले गाउँमै कप तथा प्लेट उत्पादन उद्योग सञ्चालन गरेर उदाहरण प्रस्तुत गर्नुभएको छ । विदेशको रोजगारी छाडेर करिब ३५ लाख रुपियाँ लगानीमा सुरु गरेको उद्योगमा अहिले लगानी बढाएर ७० लाख रुपियाँ पु¥याउनुभएको छ ।
दुई वर्षअघि स्थापना गरिएको सागर कप उद्योगबाट अहिले मासिक नौदेखि १० लाख रुपियाँसम्मका कप तथा प्लेट बिक्री हुने गरेको अधिकारीले बताउनुभयो । उद्योगबाट हुने आम्दानीबाट सबै खर्च कटाएर मासिक करिब एक लाख रुपियाँ बचत हुने उहाँको भनाइ छ ।
उद्योगमा चिया, कफी तथा जुसका लागि प्रयोग हुने पेपर कपसँगै खाजा तथा खानाका लागि प्रयोग हुने विभिन्न आकारका पेपर प्लेट उत्पादन हुँदै आएका छन् । उद्योगमा उत्पादित कप तथा प्लेट दाङका घोराही, तुलसीपुर, नारायणपुरलगायतका बजारसँगै रोल्पासम्म पुग्ने गरेका छन् ।
उत्पादन सुरु गरेको प्रारम्भिक समयमा बजार खोज्दै आफैँ व्यवसायीको पसल पसलमा पुग्नुपर्ने अवस्था रहे पनि अहिले माग बढ्दै गएको अधिकारीले बताउनुभयो । उहाँका अनुसार अहिले व्यवसायी उद्योगमै आएर कप तथा प्लेटको अर्डर गर्ने र सामग्री लैजाने गरेका छन् ।
माग बढ्दै गएपछि उद्योगको उत्पादन क्षमता पनि विस्तार गरिएको छ । सुरुमा कप र प्लेट उत्पादनका लागि एक/एक वटा मेसिन भारतबाट ल्याएर सञ्चालन गरिएकोमा अहिले दुई÷दुई वटा मेसिनबाट उत्पादन भइरहेको अधिकारीले बताउनुभयो । उद्योग सञ्चालनबाट स्थानीय सात जनाले प्रत्यक्ष रोजगारी पाएका छन् । स्थानीय युवा तथा महिलालाई रोजगारी दिइएको उहाँले जानकारी दिनुभयो । उद्योगका लागि आवश्यक कागजलगायत कच्चा पदार्थ भने भारतबाट ल्याउने गरिएको छ ।
अधिकारीले विदेशमा रोजगारी गर्दा हुने आम्दानीको तुलनामा स्वदेशमा तत्काल कम आम्दानी भए पनि परिवारसँगै बसेर आफ्नै ठाउँमा व्यवसाय सञ्चालन गर्न पाउँदा सन्तुष्ट रहेको बताउनुभयो । उद्योगलाई थप विस्तार गर्दै आगामी दिनमा नेपकिनसमेत उत्पादन गर्ने तयारी भइरहेको अधिकारीले बताउनुभयो । उत्पादनको माग बढ्दै गएमा थप लगानी र रोजगारी सिर्जना गर्ने योजना रहेको उहाँको भनाइ छ । उद्योग सञ्चालनका लागि आवश्यक वातावरण भए पनि दक्ष कामदारको अभाव र विद्युत्को अनियमितताले साना तथा घरेलु उद्योगले समस्या भोग्नु परेको अधिकारीले बताउनुभयो । नियमित विद्युत् आपूर्ति र दक्ष जनशक्ति उपलब्ध हुन सके उत्पादन लागत घटाउन तथा उद्योगको क्षमता विस्तार गर्न सहज हुने उहाँको भनाइ छ ।
