मलेसियाले कागजातविहीन आप्रवासी श्रमिकलाई बिनाजेल सजाय स्वदेश फर्कन पाउने कार्यक्रमलाई थप एक वर्ष निरन्तरता दिएको छ । स्वेच्छिक रूपमा स्वदेश फर्कनका लागि कागजातविहीन श्रमिकले जरिवाना तिर्नुपर्नेछ ।
मलेसिया अध्यागमन विभागद्वारा बिहीबार जारी विज्ञप्तिअनुसार ‘आप्रवासी स्वदेश फिर्ता कार्यक्रम २.०’ लाई ३१ मे २०२७ सम्म थप गरिएको हो । १९ मे २०२५ देखि लागू गरिएको यो कार्यक्रमको म्याद बिहीबार (अप्रिल ३०) देखि समाप्त भएको थियो ।
अध्यागमन विभागका अनुसार यो कार्यक्रम प्रभावकारी भएको भन्दै थप गरिएको हो । मलेसियाले कागजातविहीन आप्रवासी श्रमिकको उपस्थितिमा कमी ल्याउन यो अभियानलाई निरन्तरता दिएको हो ।
पछिल्लो एक वर्षको अवधिमा नेपालसहित ११२ देशका २ लाख ५४ हजार १८६ कागजातविहीनले जरिवाना तिरेर स्वदेश फर्केका छन् ।
गैरकानुनी रूपमा प्रवेश गर्ने र आवासीय अनुमति बिना बसोबास (ओभरस्टे) गर्नेका लागि ५ सय रिंगेट, भिसाको सर्त उल्लंघन गर्नेका लागि ३ सय र अस्थायी कागजातका रूपमा प्रत्येक पटक जारी हुने ‘विशेष पास’ का लागि २० रिंगेट जरिवाना तिर्नुपर्नेछ ।
