वैदेशिक रोजगारीका लागि तीन वर्षअघि युएईको दुबई गएका सप्तरीको शम्भुनाथ नगरपालिका– ४, सिरकजरीका ४२ वर्षीय देवनारायण राम पाँच महिनादेखि सम्पर्कविहीन भएका छन् । ऋण तिर्ने, दुई सन्तानलाई शिक्षा दिने र एउटा घर बनाउने सपना बोकेर उनी ०७९ वैशाखमा दुबई गएका थिए ।
गत मंसिरदेखि पतिसँग सम्पर्क हुन नसकेको र खोजबिनका लागि जिल्ला प्रशासन कार्यालय सप्तरी, वैदेशिक रोजगार बोर्ड र कन्सुलर विभागमा निवेदन दिएको देवनारायणकी पत्नी निलमले बताइन् । ‘निवेदन दिएका छौँ, तर कसैले पनि मेरो श्रीमान्को स्थितिबारे पत्ता लगाउन सकेका छैनन्,’ उनले भनिन् ।
निलमका अनुसार १ वैशाख ०७९ मा सपोर्ट मेनपावरमार्फत गएका देवनारायण दुबई विमानस्थलमा सरसफाइको काम गर्दै आएका थिए । उनी ५ मंसिर ०८१ मा बिदामा नेपाल फर्किने तयारीमा थिए । तर, विमानस्थलमा उनको पासपोर्ट नियन्त्रणमा लिएको निलमको भनाइ छ । ‘त्यसवेला पासपोर्ट लिएपछि उहाँ सोही विमानस्थलमा पुगेर काम गर्न थाल्नुभयो,’ उनले भनिन्, ‘०८२ मंसिर ५ गते पासपोर्ट लिन जाँदै छु भन्ने जानकारी गराउनुभयो । यसपछि उहाँ सम्पर्कमा आउनुभएको छैन । फोन पनि लाग्दैन ।’
त्यसयता परिवारका कसैसँग पनि देवनारायणको सम्पर्क हुन नसकेको निलमले बताइन् । ‘उहाँ कहाँ हुनुहुन्छ केही खबर पाउन सकेका छैनौँ,’ उनले भनिन्, ‘प्रशासनलाई सोध्दा खोजबिन भइरहेको बताउनुभएको छ ।’
जिल्ला प्रशासन कार्यालय सप्तरीअन्तर्गतको आप्रवासी स्रोत केन्द्रकी केस स्टडी प्रमुख नीता चौधरीले परराष्ट्र मन्त्रालयअन्तर्गत कन्सुलर सेवा विभागमा जानकारी गराइसकेको बताइन् । ‘त्यहाँबाट सम्बन्धित दूतावासमा समेत जानकारी गराइसकिएको छ । अहिले खोजी कार्य जारी रहेको सूचना छ,’ उनले भनिन् ।
देवनारायणका सात वर्षकी छोरी र पाँच वर्षका छोरा छन् । परिवार पाल्न अरूको खेतमा काम गरिरहेको निलमले बताइन् । ‘पाँच महिना भइसक्यो, उहाँको कुनै पत्तो छैन । साना बच्चालाई के खुवाउने, कसरी पढाउने भन्ने चिन्ताले पिरोल्छ,’ उनले आँसु पुछ्दै भनिन्, ‘अहिले अर्काको खेतबारीमा काम गरेर जेनतेन गुजारा गरिरहेकी छु ।’
