दक्षिण कोरियामा मृत्यु भएकी इलामको माई नगरपालिका– १, तिलटारकी २० वर्षीया सोनु श्रेष्ठको परिवारलाई कोरियामा बस्ने नेपालीले आर्थिक सहयोग गरेका छन्। विद्यार्थी भिसामा त्यहाँ पुगेकी सोनुको परिवारलाई ६ लाख २१ हजार रुपैयाँ सहयोग गरिएको हो।
कोरियामा अध्ययनरत नेपाली विद्यार्थी समाज (सोनसिक), त्यहाँस्थित इलामेली समाज र त्यहाँका गैरआवासीय नेपाली (एनआरएनए) ले यो सहयोग गरेका हुन्। सहयोग रकम सोनुको परिवारलाई घरमै पुुगेर हस्तान्तरण गरिएको छ।
यी संस्थाले नै सोनुको शव नेपाल ल्याउन करिब ६ लाख रुपैयाँ खर्च गरेका थिए। उनको शव नेपाल पठाउने उठेको रकमबाट उब्रिएको रकम सोनुको परिवारलाई सहयोग गरिएको हो।
भदौ २ गते निधन भएकी सोनुको शव ९ गते घर ल्याएर दाहसंस्कार गरिएको थियो। गत फेब्रुअरीमा कोरिया पुगेकी श्रेष्ठ उल्सान विश्वविद्यालयमा अध्ययनरत थिइन्। सोनुका बुबा लीलाकुमार श्रेष्ठको पनि वैदेशिक रोजगारी सिलसिलामा गत जेठमा मलेसियामा मृत्यु भएको थियो।
