होम कार्की

वैदेशिक रोजगारको प्रमुख गन्तव्य मुलुकको पारिश्रमिक वृद्धि भएको खबरले कामदारलाई खुसी तुल्याइरहेका बेला संयुक्त अरब इमिरेट्स (युएई) को पनि तलब बढ्ने भएको छ ।

युएईस्थित नेपाली दूतावासले युएईमा बढेको महँगीको आधारमा खाना र बस्न बाहेक कम्तीमा सात सय दिनार तलब तोक्न श्रम मन्त्रालयलाई सिफारिस गरेको हो । पारिश्रमिक वृद्धि भए कादारको न्यूनतम तलब १६ हजार रुपैयाँ हुने छ । श्रम मन्त्रालयले हालसम्म युएईका लागि मात्रै न्यूनतम तलब तोकेको छैन । युएई नेपाली कामदारका लागि चौथो गन्तव्य मुलुक हो ।

१० वर्षअघि मलेसियाका लागि तोकिएको १ सय २५ अमेरिकी डलरलाई आधार मानी वैदेशिक रोजगार विभागले युएईमा कामदार पठाउन अनुमति दिँदै आएको हो ।  श्रम मन्त्रालयका एक अधिकारीले दूतावासले सिफारिस गरेको तलबमाथि छलफल गरेर छिट्टै तोक्ने भएको छ ।

'कामदारको बस्ने र खाना बाहेक ७ सय दिनार तोक्न सरकारलाई सिफारिस गरिएको हो,' दूतावासका एक अधिकारीले कान्तिपुरलाई भने, 'यहाँको महँगीको आधारमा तलब बढाउन आवश्यक भइसकेको छ ।'

Published on: 7 May 2012 | Kantipur