वैदेशिक रोजगारीका लागि राजधानीस्थित राजधानीको गौशालास्थित एक मेनपावर कम्पनीमार्फत साउदी अरब पुगेका धनुषाका एक युवाले आफूले तीन महिनादेखि तलब नपाएको भन्दै उद्धार गरेर नेपाल फर्काइदिन आग्रह गरेका छन् । धनुषाको जनक–नन्दनी गाउँपालिका ३ का प्रविणकुमार मण्डलले आफू विनातलब काम गर्न बाध्य भएको भन्दै साउदीबाट उद्धार गरिदिन आग्रह गरेका हुन् ।

 

मण्डलका अनुसार उनलाई स्थानीय एजेण्ट नसिवुल राइनले कम्पनीमा स्टीकर टाँस्ने सजिलो र राम्रो कमाई हुने काममा भन्दै पठाएका थिए । उनी एचिभमेण्ट स्प्रीङ जनरल कन्ट्राक्टिङ कम्पनीमा गएका थिए । साउदी अरब पुगेपछि आफू काम गर्न आएको स्टीकर टाँस्ने कम्पनी नभइ सप्लाई कम्पनी भएको थाहा पाएको मण्डलले बताए ।

 

११ सय रियाल (झण्डै ३० हजार नेपाली रुपैयाँ) मासिक तलब हुने आश्वासनमा १ लाख बुझाएर गएको छोरोले काम नपाएको र हाल खान–बस्न समेत समस्या परेको भन्दै मण्डलका बाबु योगनारायण मण्डलले जनकपुरस्थित वैदेशिक रोजगार सूचना केन्द्रमा उद्धार गरिदिन निवेदन दिएका छन् ।