वीरेन्द्र केसी

जिल्लाबाट कामको खोजीमा विदेसिने युवाको लर्काे छ । यहाँ निर्माणाधीन साना तथा ठूला आयोजनाले भने कामदारको अभावमा समयमा काम सम्पन्न गर्न सकेका छैनन् । सरकारी भवन, स्कुल, मोटरबाटो, खानेपानी योजनासहित विकास निर्माणको क्षेत्रका काम समयमा सम्पन्न भएका छैनन् । निजी फर्म तथा संघसंस्थाले कामदार नपाउँदा व्यावसाय फस्टाएको छैन । ‘युवाको वैदेशिक रोजगारी मोहका कारण कामदार भारतबाट ल्याउनुपरेको छ,’ निर्माण व्यवसायी संघका अध्यक्ष ऋषिराम अधिकारीले भने, ‘चाहिएजति कामदार पाउन मुस्किल छ । समयमा योजनाको ठेक्का पूरा गर्न धौधौ परेको छ ।’ आफ्नै गाउँमा विकास योजनाका काम हुँदै छन् । सम्झौताअनुसार काम सम्पन्न गर्न कामदार चाहिएका छन् । स्थानीय युवाले यहाँ काम गर्न नरुचाएको उनले बताए । निर्माणाधीन आयोजनाका लागि आवश्यकभन्दा आधा मात्र कामदार जेनतेन व्यवस्थापन गर्न सकेको अधिकारीको भनाइ छ । धेरैजसो भारतीय अनि केही रोल्पा, रुकुम र सल्यानका छन् । ‘कामदार अभावकै कारण समयमा काम सम्पन्न गर्न सकस छ,’ उनले भने । निर्मााण संघमा ६८ कम्पनी आबद्ध छन् । सबैजसोले काम पाएका छन् । केही जिल्ला बाहिरका कन्ट्रक्सनले पनि काम गर्दै छन् ।