सन्तोष घिमिरे 

सरकारले म्यानमारका रोहिंग्या मुस्लिमको नेपाल प्रवेश रोक्न सीमामा कडाइ गर्न थालेको छ । परराष्ट्र मन्त्रालयसँग परामर्शपछि गृह मन्त्रालयले रोहिंग्या मुस्लिम प्रवेश गर्नसक्ने आशंकामा सुरक्षा सतर्कता बढाएको हो । अगस्ट २५ मा म्यानमारको रखाइन राज्यमा अल्पसंख्यक रोहिंग्या मुस्लिमले सुरक्षाकर्मीमाथि आक्रमण गरेपछि पुनः हिंसा भड्किएको छ । म्यानमारको सैनिक सरकारले रोहिंग्यालाई अनागरिक मान्छ तर रोहिंग्याहरू आफूहरू रखाइन प्रान्तमा सयौँ वर्षदेखि बस्दै आएको मान्छन् । राज्य र रोहिंग्याबीच जातीय हिंसामा तीन सातामा एक हजारभन्दा बढी मुस्लिम मारिएको अन्तर्राष्ट्रिय सञ्चारमाध्यमले जनाएका छन् । हिंसाबीच सीमा जोडिएको बंगलादेश प्रवेश गर्ने रोहिंग्याको संख्या चार लाखभन्दा धेरै रहेको राष्ट्रसंघले जनाएको छ ।