सुरेश बिडारी

वीरगन्ज महानगरपालिका– १३ बस्ने ३५ वर्षीय उमेश चौरासियामाथि बुधबार राति भएको गोली प्रहारमा संलग्नता रहेको आरोपमा प्रहरीले चारजनालाई पक्राउ गरेको छ । पर्सा प्रहरीले बिहीबार पत्रकार सम्मेलन गरेर घटनामा संलग्न चार अभियुक्तलाई सार्वजनिक गरेको छ । घटनामा संलग्न रहेको आरोपमा प्रहरीले चौरासियाकी श्रीमती प्रियंका, बारा परवानीपुर गाउँपालिका– १ बस्ने विकेन्द्रकुमार गुप्ता, सोही ठाउँ बस्ने मनोज गुप्ता, वीरगन्ज– १२ मुर्ली बस्ने मुन्ना साह कानूलाई सार्वजनिक गरेको हो । जिल्ला प्रहरी कार्यालय पर्साअगाडि लालबंगलाबाट पूर्व ५० मिटरको दूरीमा बन्दै गरेको आफ्नो घरनजिक चौरासियामाथि गोली प्रहार भएको थियो । नारायणी उपक्षेत्रीय अस्पताल वीरगन्जमा सामान्य उपचारपछि उनको अहिले काठमाडौंस्थित नर्भिक अस्पतालमा उपचार भइरहेको छ ।