उक्त म्यानपावर कम्पनीले राहदानी नं. ०७०४३३३५ भएका मनाउद्दिन अन्सारी, ०९९७०७६५ भएका मोहम्मद नबिजुल, ०७०८१८७३ भएका मोहम्मद नजबुल र १०२३७९९९ भएका मुसिम शेखका नाममा उक्त लट नम्बर बाट मासिक १ हजार १ सय कतारी रियाल तलव हुनेगरी २ वर्षको श्रम स्वीकृति निकालेको थियो । तर नेपाल वायु सेवा निगमको बिहीबार राति १० बजेको उडानबाट कतारको दोहा जाने क्रममा अध्यागमन कर्मचारीले उनीहरुको भीषामा कतारको ईनोभेटिभ टेक्निकल शोलुशन कम्पनीको मेसन पद देखेपछि फिर्ता गरिदिए ।

 

यो घटना गाइगुई भएपछि आफ्नो म्यानपावर कम्पनीबाट श्रम स्वीकृति निकालेका कामदार फर्किएपछि म्यानपावर सञ्चालक विमानस्थल पुगे । हतार–हतार प्रहरीमा उजुरी दिएपछि कतार उड्न हिडेका युवाहरु रातभर महनगरीय प्रहरी वृत्त गौशालाको खोरमा थुनिए ।

 

रातभर चारजना युवालाई थुनामा राखेर अनुसन्धान गरेपछि उक्त बृत्तका प्रहरी नायव उपरीक्षक अनुपम श्रेष्ठले छानविनको विषय वैदेशिक रोजगार ऐन अन्तरगतको विषय भन्दै वैदेशिक रोजगार विभाग बुद्धनगर पठाइ दिए । थुनामा परेका युवाहरु सप्तरीका हुन् । आफ्ना मतदाता थुनामा परेको थाहा पाएपछि सप्तरी क्षेत्र नं. ४ का नेपाली कांग्रेसका सांसद तेजुलाल चौधरी गौशाला पुगे । सांसद चैधरीले आफ्नै गाडीमा राखी ती युवालाई विभाग पुर्याए ।

 

तर विभागले मदरल्याण्ड ओभरसिज प्रालिले श्रम स्वीकृति लिएका कारण उक्त कम्पनीमाथि छानविन गर्ने बताउँदै पक्राउ परेका युवाहरुलाई थुनामा राख्न नसकिने बताउँदै पुनः गौशाला पठायो । गौशालाका प्रहरी नायव उपरीक्षक श्रेष्ठले विषय अनुसन्धानकै क्रममा रहेका तथा युवाहरु र म्यानपावर कम्पनीका सञ्चालकलाई तारेखमा छोडेको जानकारी दिए । उनले भने–‘कागजातको अध्ययन गर्दा सरकारी कागज किर्ते गरेको नदेखिएका कारण अनुसन्धानका लागि थुनामा राख्न आवश्यक देखिएन ।’

 

म्यानपावरका सञ्चालक टेकबहादुर पौडेल हुन् भने खगेन्द्र घिमिरे उनका श्रम प्रतिनिधि हुन् । विदेश उड्नपर्ने युवाहरु फर्केपछि श्रम प्रतिनिधि घिमिरे सम्पर्क विहीन बनेका छन् । यसबारे मध्यान्हले थप अनुसन्धान जारी राखेको छ ।