यस्ता केन्द्रहरु म्यानपावरले तोकिएकोभन्दा बढी पैसा अशुल्ने स्थानका रुपमा प्रयोग गरिरहेका छन् । उनीहरुले नै मिलेमतोमा एजेन्टका लाखभन्दा बढी शुल्क अशुल्ने र म्यानपावरबाट १० हजरको रसिद थमाउने गरेका छन् ।

 

यसले वैदेशिक रोजगारीमा जानेहरु ठगिने क्रम बढेको छ । यस्ता पासपोर्ट संकलन केन्द्रले लामो समयसम्म पासपोर्ट होल्ड गरेर राख्ने गरेको पनि पाइएको छ ।

 

अब विदेशिने युवालाई प्रलोभनमा पारेर महिनाअघिदेखि अगि्रम शुल्क उठाउने र अवैध रुपमा विदेश पठाउने कार्यमा संलग्न हुनेविरुद्ध कारवाही अभियान सुरु भएको हो । यस्ता पासपोर्ट संकलन गर्ने अखडाहरुको सूचना लिएर कारवाही गर्ने कामको सुरुआत भएको श्रम तथा रोजगार मन्त्रालय स्रोतले जनाएको छ ।

 

बुधबार प्रहरीले नयाँ बसपार्कको एक होटेलमा छापा मारेर विदशे पठाउने बाहानामा थन्क्याएर राखिएका ४१ वटा पासपोर्ट जफत गरेको छ । राहदानी संकलन गरी राखेको आरोपमा महानगरीय प्रहरी प्रभाग गोंगबुले नयाँ बसपार्क मित्रनगरमा रहेको स्वर्गद्वारी गेस्ट हाउसका संचालक प्रेमबहादुर बिकलाई पक्राउ गरेको छ ।

 

राहदानीसहित प्रहरीले विकलाई वैदेशिक रोजगार विभागमा बुझाएको छ । विभागका प्रवक्ता उद्ववप्रसाद रिजालकाअनुसार प्रारम्भिक बयानमा विकले फेसिलिटी म्यानपावरमा अन्तर्वार्ता दिन आएका व्यक्तिहरुको राहदानी आफूले राखिदिएको बताएका छन् । अब विभागले यस्ता राहदानी सकलन केन्द्रहरुमा विशेष कारवाही सुरु गर्ने जनाएको छ ।

 

‘अब यस्ता पासपोर्ट संकलन केन्द्रहरुमाथि अनुसन्धान गर्छौं । यसमा म्यानपावर व्यवसायीको पनि संलग्नता देखिएकाले तिनलाई पनि तान्छौं,’ रिजालले भने,’अवैध रुपमा भएका कामलाई निस्तेज पार्न अभियानकै रुपमा अघि बढ्ने योजना बनाएका छौं ।’