पक्राउ परेका ६ जना पाकिस्तानी अहिले अध्यामगन विभागको हिरासतमा छन् । त्रिभुवन अन्तर्राष्ट्रिय विमानस्थलस्थित अध्यागमन कार्यालयका कर्मचारीले प्रहरीको सहयोगमा ठमेलबाट चार र विमानस्थलबाट १ जना पाकिस्तानी नागरिकलाई पक्राउ गरेका हुन् । अध्यागमन कार्यालयले बेलायतको नक्कली राहदानी प्रयोग गर्ने पाकिस्तानी नागरिक गौरी नुजाथ नाज, इलिही फिजा, इराम साज्दा, सोहिल मुहम्मद र इलिही जाकालाई पक्राउ गरेको हो । यी पाँच पाकिस्तानीलाई बेलायतको नक्कली राहदानी उपलब्ध गराएर एजेन्टको काम गर्दै आएका पाकिस्तानी राहदानी वाहक दिन माजार फारिद उदलाई समेत पक्राउ गरिएको छ ।

 

उनीहरूलाई अनुसन्धानका लागि कालिकास्थानस्थित अध्यागमन विभागमा बुझाइएको छ । अवैध रूपमा बेलायत जान खोज्ने पाकिस्तानी नागरिकलाई पक्राउ गरी थप अनुसन्धानका लागि विभाग पठाइएको विमानस्थलस्थित अध्यागमन कार्यालयका प्रमुख होमनाथ थपलियाले बताए ।

 

पाकिस्तानी नागरिक गत शुक्रबार दुबईको सारजाहबाट काठमाडौँ आएका थिए । सारजाहबाट काठमाडाँै आउने क्रममा पाकिस्तानी राहदानीमा प्रस्थान अनुमति लिएका ती पाँच जना पाकिस्तानी नागरिकले विमानस्थल अध्यागमनमा भने बेलायतको नक्कली राहदानी देखाएका थिए । त्रिवि अध्यामगनका कर्मचारीले ती पाकिस्तानी नागरिकले पेस गरेको बेलायतको नक्कली राहदानीमा नेपालको प्रवेशाज्ञा (भिसा) दिएका थिए ।

 

एजेन्टको काम गर्ने फारिदले भने त्रिवि अध्यागमनमा पाकिस्तानकै राहदानीमा भिसा लिएका थिए । त्रिवि अध्यागनका कर्मचारीले प्रवेशाज्ञा दिँदा उनीहरूले प्रयोग गरेको बेलायती राहदानी नक्कली भएको पत्तो पाएनन् । तर उनीहरू पाकिस्तानी नागरिक भएको थाहा पाएपछि अध्यागमनका कर्मचारी प्रहरीसहित उनीहरूलाई खोज्न परिचालित भएका थिए ।