'सानोतिनो बिमार हो, चौकीदार बसेर उपचार गरूँला भनेर आएँ, ब्लड क्यान्सर रै'छ,' मुम्बईको एक आफन्तकोमा भेटिएका बाजुराका ३६ वर्षीय खम्म चँदराले पीडा पोखे, 'यहाँ आएर न काम गर्न सक्ने भएँ, न उपचार गर्न, अब म के गरूँ ?'

डेढ महिनाअघि आएका बुढीगंगा-२, बाजुराका चँदरा मुलुनइस्टस्थित मिठाघर रोडमा आफन्तसँग छन् । आफन्तहरूले नै अरू नेपालीको सहयोगमा उनको जाँच गराए । 'जाँच गर्दा ४० हजार भारु जति खर्च भयो, सबैसँग उठाएर बल्लबल्ल पुर्‍यायौं,' मुम्बईमा चौकीदार गर्दै आएका चँदराका छिमेकी नन्दबहादुर मिजारले भने, 'उपचारलाई ७/८ लाख रुपैयाँ लाग्छ, जुटाउनै नसक्ने भइयो ।'

मुम्बईको परेलस्थित केईएम अस्पतालका अनुसार चँदरा 'एक्युट माइलोइड लुकेमिया (एमलए) का बिरामी हुन् । 'उपचारका लागि ४ देखि ५ लाख भारु लाग्छ,' उक्त अस्पतालका डा. महेश आरको लागत पत्र -कस्ट सर्टिफिकेट) मा उल्लेख छ, 'बिरामीमा यदि समस्या बढ्दै गयो भने खर्च अरू बढ्न सक्छ ।' उनको परीक्षण टाटा मेमेरिया अस्पतालमा भएको थियो ।

घरबाट आफन्तको साथ लागेर आएका चँदरा उपचार गराउन सक्ने अवस्थामा छैनन् । 'आउँदा ४ दिन लाग्यो, सरसापट गरेर ल्याएको १० हजार खर्च भयो ।' चँदराले भने, 'घरमै खान पुग्दैन कसरी औषधि उपचार गर्ने ?'

उपचार गराउन नसकेपछि उनी अस्पतालको रिपोर्टको ठेली र केही औषधि बोकेर एक छिमेकीको साथ लागेर घर फर्किसके । '७/८ लाख लाग्ने भएपछि फर्किनुभयो,' चँदराका मित खम्म साउदले भने, 'हामीले पनि केही गर्न सक्ने अवस्था छैन, अब कसरी बचाउने ?' घरमा आमा, श्रीमती र चार छोरा रहेका चँदराले खेतीबाट ६ महिनादेखि पुग्दैन भन्दै उपचारका लागि गुहार मागेका छन् ।

काठमाडौंस्थित कान्तिपुर संवाददाताले वीर अस्पतालका चिकित्सक डीपी सिंहसँग सम्पर्क गर्दा उनले यो रोग ब्लड क्यान्सर भएको र उपचार गरे ठीक हुने बताए । 'सुरुको स्टेज -अवस्था) हो भने त्यति रकम पनि लाग्दैन,' उनले भने, 'स्टेज अनुसार लाग्न सक्छ, गरिबका लागि केही सरकारी सुविधा पनि छ ।'

Published on: 12 July 2013 | Kantipur