ईपीएस मार्फत दक्षिण कोरियामा काम गर्न चाहने नेपालीले भाषा परिक्षाको लागि आवेदन भर्न देखिएको सास्ती कम गर्न अघिल्लो वर्षदेखि अनलाइन प्रणाली लागू गरिए पनि रोजगार आकांक्षीको सास्ती कम भएन । विहीबार भाषा परीक्षाको फारम भर्न शुल्क बुझाएको बैंक भौचर अनिवार्य गरिएपछि अधिकांश युवा बुधबार रातिदेखि नै बैंकमा रकम बुझाउन लाइन लागेका थिए । त्यसमध्ये केही विस्ताराको प्रबन्ध गरी लाइनमा आएका थिए ।

 

आगामी वर्ष जेठ २६ र २७ गते पोखरा र काठमाडौंमा भाषा परीक्षा हुनेछ । नतिजा १६ गते प्रकाशन गरिने ईपीएस कोरिया शाखाले जनाएको छ । ईपीएस कार्यालयले एउटै मात्र आईएमई बैंकमा रकम जम्मा गरेको भौचर मान्य हुने तय गरेपछि चैत १८ गतेसम्म भाषा परीक्षाको आवेदन गर्न पाइने भएपनि युवाहरू बुधबार रातिदेखि आईएमई बैंकमा लागिरहेका थिए । बैंकमा परीक्षार्थीले २४ अमेरिकी डलर परीक्षा शुल्क बुझाएका छन् । ईपीएसबाट आगामी वर्ष उत्पादमूलक क्षेत्रतर्फ ४ हजार ८ सय र कृषि तथा पशुपालन क्षेत्रतर्फ २ हजार ३ सय गरी जम्मा ७ हजार १ सय जना उत्तीर्ण हुनेछन् । पोखराका हकमा भने शुरुमा केन्द्र रोजेका मध्ये १२ हजार जनाले पोखरा केन्द्र छनोट गर्न पाउनेछन् । बाँकीको भने ईपीएसले केन्द्र तोक्नेछ ।

 

फौजदारी अभियोगमा अदालतबाट सजाय नपाएका वा कोरियामा गैह्रकानूनी रुपमा बसोबास गरी नेपाल फिर्ता भएका वाहेक १८ वर्ष पूरा भइ ३९ वर्ष ननाघेका नेपाली नागरिकले भाषा परीक्षा दिन पाउने व्यवस्था गरिएको छ ।