१० हजारले पाउँदै छन् कोरिया जाने अवसर, नौ गुणाभन्दा बढीले आवेदन दिएका छन्

गोपाल साउद

इपिएस प्रणालीमार्फत वैदेशिक रोजगारीमा दक्षिण कोरिया जान ९२ हजारभन्दा बढीको आवेदन परेको छ । ७ चैत राति १२ बजेदेखि खुला गरिएको इपिएस भाषा परीक्षाको फाराम भर्नेको संख्या आइतबार साँझ ८ बजेसम्म ९२ हजार २ सय ४ पुगेको हो । आवेदन भर्नेमध्ये ६३ हजार ३ सय ७० जनाले उत्पादनमूलक क्षेत्रमा र २८ हजार ८ सय ३४ जनाले कृषि तथा पशुपालन क्षेत्रमा जान चाहेका छन् । आइतबार राति १२ बजेसम्म फाराम भर्ने अन्तिम समय भएकाले यस वर्ष इपिएस भाषा परीक्षाका लागि ९४ हजारसम्म आवेदन पर्न सक्ने अनुमान गरिएको छ । भाषा परीक्षामा सहभागी हुनेहरूमध्येबाट उत्पादनमूलक क्षेत्रतर्फ ७ हजार ५० र कृषि तथा पशुपालनतर्फ ३ हजार गरी अनुमानित १० हजार ५० जना छनोटमा पर्नेछन् । यद्यपि, कामदारको मागअनुसार उत्तीर्ण हुनेको संख्या घटबढ हुन सक्ने इपिएस शाखाका निर्देशक कृष्ण खनालले जनाए ।

कति नेपाली कामदार छन् कोरियामा ?

कोरियाले इपिएस प्रणालीमार्फत नेपालसहित १६ देशबाट विदेशी कामदार लैजाँदै आएको छ ।  हालसम्म इपिएस प्रणालीमार्फत नेपालबाट करिब ६० हजार नेपाली कामदार वैदेशिक रोजगारीका लागि कोरिया गएका छन् ।

४ वर्ष १० महिनाका लागि कोरियामा काम गर्ने अनुमति दिइने भए पनि फर्किएकाहरूको तथ्यांक व्यवस्थित नहुँदा हाल त्यहाँ कार्यरत नेपालीको संख्या भने यकिन गर्न सकिने अवस्था छैन । द्विपक्षीय सम्झौताका आधारमा सरकारले नै नेपाली कामदार कोरिया पठाउँदै आएको छ ।

अनलाइन भुक्तानी सुविधा भए पनि रातभर बैंकमा लाइन

यस वर्षदेखि इसेवा, आइएमई पे र ग्लोबल आइएमई बैंकको अनलाइन बैंकिङबाट परीक्षा शुल्क र फाराम भर्न सकिने व्यवस्था गरिएको भए पनि युवाहरू पहिलो दिन रातभर ग्लोबल आइएमई बैंकका शाखा कार्यालयमा लाइन बसेका थिए । तर, त्यसपछिका दिनमा भने बैंकका शाखाहरूमा इपिएस भाषा परीक्षाको शुल्क बुझाउनेको लाइन देखिएन । भाषा परीक्षाको फाराम भर्ने अन्तिम समय आइतबार राति १२ बजेसम्मका लागि तोकिएको थियो । देशभित्र आकर्षक रोजगारी नहुँदा वार्षिक ६ लाखसम्मको संख्यामा युवाहरू रोजगारीका लागि विभिन्न देशमा जाने गरेका छन् ।

२५ र २६ जेठमा परीक्षा, १३ असारमा नतिजा

काठमाडौं र पोखरा केन्द्रबाट सञ्चालन हुने इपिएस भाषा परीक्षा आगामी जेठ २५ र २६ गते हुनेछ । पोखराबाट २० हजारले मात्रै भाषा परीक्षा दिन पाउनेछन् भने बाँकीले राजधानीबाट परीक्षामा सहभागी हुनुपर्नेछ । परीक्षाको नतिजा इपिएस कोरियाको अनलाइनमा १३ असारमा प्रकाशित हुनेछ । भाषा परीक्षाको नजितापछि सीप परीक्षण हुनेछ । चैतभित्रै परीक्षाकेन्द्रको टुंगो लाग्ने इपिएस शाखाले जनाएको छ ।

यस वर्षदेखि सीप परीक्षणलाई अनिवार्य गरिएको छ । भाषा परीक्षामा पास भएकाहरूले लगत्तै सीप परीक्षणमा सहभागस् हुनुपर्ने इपिएए शाखाले जनाएको छ ।

कस्तो हुनेछ भाषा परीक्षा ?

भाषा परीक्षामा उत्पादनमूलक क्षेत्रको पूर्णांक १ सय र कृषि तथा पशुपालन क्षेत्रतर्फ ९० अंकको हुनेछ । जसमा सुनाइ र पढाइमा २०–२० गरी कुल ४० प्रश्न समावेश हुनेछन् । उत्पादनमूलक क्षेत्रतर्फ ४७ दशमलव ५ र कृषि तथा पशुपालनतर्फ ३६ अंक ल्याउनेहरूमध्ये उच्च अंक प्राप्त गर्नेहरूबाट उत्तीर्णको छनोट हुनेछ । भाषा परीक्षामा पास हुँदैमा कोरिया जान पाउने ग्यारेन्टी नहुने इपिएस शाखाले स्पष्ट पारेको छ । त्यसका लागि सीप परीक्षा अनिवार्य रूपमा पास हुनुका साथै रोजगारदाताको छनोटमा समेत पर्नुपर्ने हुन्छ । यद्यपि, भाषा परीक्षा पास गरेको दुई वर्षसम्म जाने सम्भावना भने रहन्छ । भाषा परीक्षामा उत्तीर्ण परीक्षार्थीले दोस्रो चरणको सीप परीक्षण र कम्पिटेन्सी टेस्टमा समेत उत्तीर्ण भएपछि मात्र रोजगार आवेदन फाराम भर्न सक्नेछन् । १८ वर्ष पूरा भई ३९ वर्ष ननाघेका परीक्षार्थीले इपिएस भाषा परीक्षामा सहभागिता जनाउन सक्ने व्यवस्था छ ।

Published on: 1 April 2019 | Nayapatrika