जितेन्द्र साह

पाँच वर्ष गणित पढाएका मोरङको सुन्दरहरैंचा नगरपालिका–३ गछियाका २८ वर्षे अनिल खुलाल खेतीकिसानी सिकिरहेका छन् । इजरायलमा प्रविधिमैत्री खेतीपाती पढ्न जान उनी जहदास्थित शैलजा आचार्य स्मृति पोलिटेक्निक कलेजमा सामुदायिक कृषि सहायक विषयमा सैद्धान्तिक एवं प्रयोगात्मक ज्ञान लिइरहेका छन् । उनीसहित ३८ युवायुवती यहाँ पढिरहेका छन् ।

उनीहरूले यसपछि ११ महिनासम्म उत्तरी इजरायलको किन्नरेट कलेजमा पढ्दै र यसैसँग सम्बन्धित आयमूलक काम गर्नेछन् । ‘सानैदेखि खेतीपातीमै मन लाग्थ्यो तर रुचि विपरीतको विषय पढेछु र जागिर खाएछु जस्तो लाग्न थाल्यो,’ शिक्षकको जागिर छाडेर यता मोडिएका खुलालले भने, ‘अवसर आएपछि मार्ग परिवर्तन गरेँ ।’