थाइल्यान्ड बसेर दुई सय नेपाली युवासँग १३ करोड रुपैयाँभन्दा धेरै ठगी गर्ने भोजपुर हेलौचा–३ का पर्शुराम गुरुङ पक्राउ परेका छन् । नेपाल प्रहरीको केन्द्रीय अनुसन्धान ब्युरो (सिआइबी)बाट खटिएका प्रहरी टोलीले उनलाई शनिबार त्रिभुवन अन्तर्राष्ट्रिय विमानस्थलबाट पक्राउ गरेको हो । गत १३ चैतमा थाइल्यान्ड प्रहरीले ठगी मुद्दामा उनलाई पक्राउ गरेको थियो । नेपाल प्रहरी, थाइल्यान्डस्थित नेपाली दूतावास र थाई प्रहरीको सहकार्यमा पक्राउ परेका थिए । करिब दुई महिना थाई सरकारले अध्यागमन हिरासतमा राखेपछि उनलाई नेपाल डिपोर्ट गरेको थियो । 

 

 

प्रहरीका अनुसार आकर्षक रोजगारीमा क्यानाडा लैजाने प्रलोभनमा गुरुङले युवा ठग्दै आएका थिए । उनीविरुद्ध ८५ निवेदन सिआइबीमा दर्ता भइसकेका छन् । जसमध्ये तीनवटा निवदेन अनुसन्धानपछि अदालतमा मुद्दा दर्ता भएका छन् । 

 

सिआइबी प्रमुख डिआइजी नीरजबहादुर शाहीले गुरुङविरुद्ध मानव बेचबिखन तथा ओसारपसार, संगठित अपराध र ठगी मुद्दामा अनुसन्धान हुने बताए । ‘उनले क्यानडा, फ्रान्स, कोरिया, मकाउ, अस्ट्रेलिया, अमेरिकालगायत मुलुक लगिदिने प्रलोभनमा दुई सयजनाभन्दा धेरै नेपाली युवा ठगेको पाइयो,’ उनले भने, ‘पीडितसँग पाँच लाखदेखि २० लाख रुपैयाँ रकम असुलेको भेटियो । ठगिएको रकमको परिमाण अर्बको हाराहारी हुन आउँछ । यो मानव तस्करी हो ।’

 

सिआइबीले उनीविरुद्ध ०७२ देखि मानव तस्करी अभियोग मुद्दा दर्ता गरी अनुसन्धान सुरु गरेको थियो । थाइल्यान्डमा लुकेको सूचना प्राप्त भएपछि प्रहरीले गुरुङविरुद्ध इन्टरपोलमार्फत डिफ्युजन नोटिस जारी गरेको थियो । सोही कारण २२ जेठ ०७२ मा उनको राहदानी रद्द भएको थियो । तर, उनी जाली राहदानीबाट ट्राभल डकुमेन्ट बनाई थाइल्यान्डमा विभिन्न परिचयमा लुक्दै आएका थिए ।