कान्तिपुर संवाददाता

काठमाडौँ — नेपाल वायुसेवा निगमले दुबईमा अलपत्रमध्येका २ सय ६२ नेपाली कामदारलाई आइतबार उद्धार गरी काठमाडौं ल्याइपुर्‍याएको छ ।

साँझ ७ बजे काठमाडौं उत्रिएको विमानमा दुई शिशु र एक नेपालीको शवसमेत ल्याइएको त्रिभुवन अन्तर्राष्ट्रिय विमानस्थल कार्यालयले जनाएको छ । गत सोमबार दुबई पुगेर पनि निगमको वाइडबडी विमान यी यात्रुलाई नल्याई रित्तै काठमाडौं फर्किएको थियो । 

आइतबार बिहान साढे ९ बजे काठमाडौंबाट उडेको वाइडबडीमार्फत १ सय ६४ यात्रु र एक शिशुसमेत दुबई उत्रिएका थिए । आइतबार नै त्रिभुवन विमानस्थलमा योसहित चारवटा चार्टर उडान भए । जसमा हिमालय एयरलाइन्सका दुईवटा विमान मेडिकल कार्गो लिन साँझ चीनको कुन्मिङ गएका थिए । बिहान रसियन भोल्गा डेनेपर एयरलाइन्सको कार्गो विमान इलुजन–७६ श्री एयरलाइन्सका दुईवटा हेलिकप्टर ल्याएर काठमाडौं आएको थियो ।

यस दिन आन्तरिकतर्फ पाँचवटा चार्टर उडान भए । जसमा तारा एयरको विमान कार्गो लिएर लुक्ला गएको थियो भने सीता एयरको विमान ८ जना यात्रु लिएर नेपालगन्ज पुगेको थियो । त्यसैगरी प्रभुको हेलिकप्टर पोखरा, एयर डाइनेस्टीको विराटनगर र मनाङ एयरको हेलिकप्टर लुक्ला प्रस्थान गरेका थिए ।

Published on: 24 August 2020 | Kantipur