रोजगारका सिलसिलामा साउदी अरब पुगेका रोल्पा नगरपालिका १० धबाङका दिलबहादुर घर्ती मगरको जीवन रक्षाका लागि आवश्यक ‘ब्लड मनी’ संकलन तीव्र भएको छ । दुई वर्षदेखि साउदी जेलमा रहेका दिलबहादुरलाई त्यहाँको अदालतले ६५ लाख रुपैयाँ ब्लड मनी तोकेको छ । संकलित रकम परराष्ट्र मन्त्रालय हुँदै साउदी अरबका मृतक परिवारले पाएपछि दिलबहादुर जेलमुक्त हुनेछन् । के थियो दिलबहादुरको गल्ती ?

 

दिलबहादुर घर्ती मगर उनले चलाएको ट्रकमा साउदी नागरिकले चलाइरहेको कार ठोक्किँदा साउदी नागरिकको मृत्यु भएपछि अदालतले दिलबहादुरको ७५ प्रतिशत गल्ती देखाएको थियो । त्यसबापत मृतकका परिवारलाई २ लाख २५ हजार रियाल (करिब ६५ लाख रुपैयाँ) क्षतिपूर्ति दिन अदालतले फैसला गरेको थियो । साउदीस्थित नेपाली दूतावासले गरेको पुनरावेदनमा पनि अदालतले पुरानै फैसलालाई सदर गरेपछि दिलबहादुरले मृतकका परिवारलाई ६५ लाख तिर्नैपर्ने भएको हो ।

 

 

ऊर्जा, जलस्रोत तथा सिँचाइमन्त्री वर्षमान पुन ‘अनन्त’ को सक्रियतामा ‘दिलबहादुर घर्ती बचाउन ब्लड मनी संकलन अभियान’ मूल समारोह समिति गठन गरी सहयोग संकलन थालिएको हो । उपराष्ट्रपति नन्दबहादुर पुनका छोरा अखिल (क्रान्तिकारी)का उपाध्यक्ष दीपेश पुनको संयोजकत्वमा गठित मूल समितिले तोकिएको रकम करिब–करिब संकलन गरिसकेको छ ।

 

‘दिलबहादुरलाई समस्या आइसकेपछि उहाँका आफन्त मकहाँ आउनुभयो, मैले नै मूल समिति गठनका लागि पहल गरेँ,’ मन्त्री अनन्तले भने, ‘विश्वभरका नेपालीले आफ्नै दाजुभाइ सम्झेर दिलबहादुरलाई सहयोग गर्नुभयो, उहाँको रिहाइ र नेपाल ल्याउन कूटनीतिक तथा प्रशासनिक पहल गर्दै छु ।’

 

आवश्यक ब्लड मनी संकलन हुँदा खुसी लागेको संयोजक दीपेश पुनले बताए ‘हामीले अभियान गर्दै भनेका थियौँ, दिलबहादुर घर फर्कनेछन् । यसमा हामी करिब सफल भएका छौँ,’ उनले भने । संकलित रकम केही समयभित्रै पत्रकार सम्मेलन गरेर सार्वजनिक गरिने उनले बताए । मन्त्री पुनले पनि एक लाख रुपैयाँ सहयोग गरेका छन् । वर्षमान पुन र पूर्वसभामुख ओनसरी घर्ती मगरले संयुक्त रूपमा उक्त रकम सहयोग गरेका हुन् ।

 

 

दिलबहादुर बताउन एकै दिन १५ लाख संकलन गरी हस्तान्तरण गरिएको छ । ऊर्जामन्त्री र पूर्वसभामुखसहित वाइसिएल रोल्पाको पहलमा संकलित पाँच लाख ७८ हजार, प्रदेश सांसद लालकुमारी पुन ‘सुशीला’बाट ५० हजार र मगर संघ कतारबाट प्राप्त २५ हजार रुपैयाँ, मगर संघ साउदी अरबबाट संकलित सात लाख ५० हजार रुपैयाँ बिहीबार मूल समितिलाई हस्तान्तरण गरिएको हो ।

 

साउदी अरबबाट विभिन्न संघ संस्थाले संकलन गरेको साढे आठ लाख रुपैयाँ मूल समितिले प्राप्त गरिसकेको छ । दिलबहादुर बचाउँन रोल्पालीसहित सयौँ नेपालीले सहयोग गरेका छन् । रोल्पा उद्योग वाणिज्य संघले बजारभरि थोरै थोरै सहयोग जम्मा गर्दै एक लाख ४८ हजार ६ सय ४५ रुपैयाँ पु¥याएर हस्तान्तरण गरेको छ । रोल्पा नगरपालिकाले पनि दिलबहादुर बचाउन आर्थिक सहयोग गरेको मेयर पूर्ण केसीले बताए ।