'अलपत्र परेकाको खोजी भइरहेको छ,' राजदूत शाहले नागरिकसँग टेलिफोनमा भने, 'उनीहरू दूतावासको सम्पर्कमा आउन चाहेका छैनन्।' ब्राजिलमा अलपत्र पर्नेमध्ये एकजनाले मात्र भए पनि दूतावास आएर निवेदन दिए उद्धार गर्न सहज हुने उनले बताए। हालसम्म कोही पनि दूतावास नआएको र दूतावासले सम्पर्क गर्न खोज्दा पनि उनीहरूले बेवास्ता गर्ने गरेको उनको भनाइ छ।

 

राजदूत शाहका अनुसार अलपत्र परेकामध्ये सातजनाको टेलिफोन नम्बर पत्ता लगाई सम्पर्क गर्न खोज्दा उनीहरूले फोन नै काटिदिने गरेका छन्। अलपत्र पर्नेहरू विभिन्न ठाउँमा छरिएर रहेकाले उनीहरूसम्म पुग्न अप्ठेरो परेको उनले जनाए।

 

'उनीहरूलाई कसले के भनेको छ कुन्नि, हामीले फोन गर्दा फोनै काटिदिन्छन्,' राजदूत शाहले भने, 'अझै अमेरिका जान पाइन्छ कि भन्ने आस भएर हो कि, ठूलो रकम फसाएर घर फर्किदा घर-परिवारले केही भन्लान् भन्ने डरले हो, उनीहरू आफ्नो वास्तविक परिचय दिन पनि मान्दैनन्।'

 

दूतावासले खोजी गर्दा अलपत्र परेकाहरुमध्ये केही वृद्धाश्रम र केही चर्चमा बसेको पाइएको शाहले बताए। उनीहरूले त्यहाँ आफूलाई भुटानी शरणार्थी भनेर चिनाउने गरेका छन्। भुटानी शरणार्थीले ब्राजिलमा परिचय पाइसकेकाले बसाइ सहज हुन्छ भनेर उनीहरूले आफूलाई भुटानी बताउने गरेको शाहको बुझाइ छ।

 

'विभिन्न माध्यमबाट खोजी गर्दा केही चर्चमा भेटिएका छन्। उनीहरूले आफ्नो वास्तविक परिचय लुकाई भुटानी शरणार्थी बनेर बसेको पाएका छौं,' राजदूत शाहले भने, 'उनीहरूले आफूलाई भुटानी शरणार्थी हौ भनेपछि तिमीहरू नेपाली हौ भनेर उद्धार गर्न मिल्दैन।'

 

अलपत्र परेकालाई अप्ठेरो परे दूतावासमा आएर निवेदन दिन आग्रह गरिएको उनले बताए। कसैले आधिकारिक निवेदन नदिएसम्म उद्धार गर्न नमिल्ने शाहको भनाइ छ। एजेन्टहरूले अझै अमेरिका पुर्याथइदिने आश्वासन दिएकाले उनीहरूले आफ्नो परिचय लुकाएको हुनसक्ने उनको भनाइ छ। 'कोही फर्कनै चाहँदैनन्,' राजदूत शाहले जानकारी दिए, 'परिचय लुकाए पनि साह्रै अप्ठेरो परेका केहीलाई व्यक्तिगत तवरमा रकम उठाएर दिएका छौं।'

 

बोलिभियामा नेपालीलाई अन अराइएभल भिसा दिने भएकाले एजेन्टहरूले नेपालीलाई ब्राजिलबाट बोलिभिया छिराउने गरेको बुझाइ शाहको छ। बोलेभियामा अलपत्र परेकाको पनि औपचारिक/अनौपचारिक च्यानलबाट वास्तविकता बुझ्ने काम भइरहेको उनले जनाए। कोस्टारिकामा पक्राउ परेका सातजना नेपालीका बारेमा पनि दूतावासले बुझिरहेको उनले बताए। 

 

राष्ट्रिय तथा अन्तर्राष्ट्रिय मानव तस्करको प्रलोभनमा परी अमेरिका जान हिँडेका एक हजारभन्दा बढी नेपाली ल्याटिन अमेरिकाका विभिन्न देशमा अलपत्र परेका छन्। मोटो रकम लिई अमेरिका छिराइदिने भन्दै उनीहरूलाई तस्करले ब्राजिल, चिली, बोलिभिया, इक्वेडर, कोस्टारिका लगायत ल्याटिन अमेरिकी मुलुकमा अलपत्र पारेका हुन्। तस्करहरूले ब्राजिलबाट विभिन्न देश हुँदै मेक्सिकोबाट अमेरिका प्रवेश गराउने भनी प्रति व्यक्ति २२ लाख रुपैयाँसम्म लिने गरेको अलपत्र परेकाहरूले बताउँदै आएका छन्।