देवेन्द्र भट्टराई

मानव तस्करीको अन्तर्राष्ट्रिय सञ्जाल उपयोग गर्दै इन्डोनेसियाबाट ब्राजिल लैजाने क्रममा बाटैमा अलपत्र परेकाको समाचार सार्वजनिक भएलगत्तै त्यही गिरोहबाट अरू पनि दर्जनौं पीडित भएको जानकारीमा आएको छ । 

पोखराका एजेन्ट विष्णु गुरुङ र उनकी श्रीमती बिनुमाया गुरुङले जनही ४ लाख रुपैयाँ उठाएर एक वर्षअघि ६ जनालाई इन्डोनेसिया पुर्‍याएका थिए । तीमध्ये थानकोटका नकुल सुनारको बाली प्रान्तमा दुर्घटनामा मृत्यु भएपछि गिरोहबारे थाहा भएको हो । 

परराष्ट्रको कन्सुलर शाखाले पहल गरे पनि नकुलको शव फिर्ता ल्याउन र अरूलाई उद्धार गर्न सकिएको छैन । इन्डोनेसियामा नेपालको कूटनीतिक सम्पर्क नरहेको र मलेसियाको क्वालालम्पुरस्थित नियोगले सहप्रमाणीकरण हेर्ने भएकाले उद्धार प्रक्रिया 'पत्राचार' मै सीमित छ ।  'मलेसियास्थित दूतावासबाट एक कूटनीतिक कर्मचारीलाई जकार्ता पठाउने पहल भएको छ,' परराष्ट्रका एक अधिकारीले भने, 'क्वालालम्पुर-जकार्ता आवतजावतका लागि वैदेशिक रोजगार प्रवर्द्धन बोर्डबाट तत्काल १ लाख २५ हजार रुपैयाँ निकासा हुनेछ ।' ब्राजिल लैजाने भनेर गिरोह सञ्चालन गर्ने गुरुङ दम्पतीको ठगीमा पर्नेहरूले जनही दुई लाखदेखि ४ लाख रुपैयाँसम्म शुल्क बुझाएको जानकारी दिए । गिरोहका सहायक एजेन्ट ज्ञानेन्द्र सुनार र सानुभाइ विश्वकर्मामध्ये सुनार अहिले हनुमानढोका थुनामा छन् । पीडितहरूले मुख्य एजेन्ट गुरुङकी श्रीमती बिनुमायालाई पनि पोखराबाट पक्राउ गरेर हनुमानढोकामा बुझाएका छन् । 'मेरी छोरी हीरा गुरुङ पनि अहिले जकार्ताको अध्यागमन थुनामा परेकी छ,' पोखराबाट आएकी हीराकी आमा कान्छी गुरुङले कान्तिपुरसँग भनिन् । 

पोखरेली नाता भएकाले उनले भने मुख्य एजेन्ट बिनुमायालाई २ लाख ५० हजार रुपैयाँ मात्रै बुझाएकी थिइन् ।' 'गुरुङ दम्पतीको गिरोहले हामी सबैबाट गरेर १ करोड रुपैयाँभन्दा बढी रकम उठाएको पाइएको छ,' जकार्तास्थित अध्यागमनमा आफ्ना भाइ कजन पोखरेल थुनामा परेपछि आक्रोशित दाजु रजनले भने । गुरुङ दम्पतीलाई त्यसरी नै पैसा बुझाएका धादिङका प्रकाश दुधराज, लव सुनार, उद्धव सुनार, आशिक सुनार, अमरबहादुर सुनार र नुवाकोटका कुमार सुनार पनि कान्तिपुर कार्यालय आएका थिए । 

कलंकीका गणेश रिसाल र थानकोटका मोहन सुनारले पनि आफूहरू गुरुङ गिरोहबाट पीडित भएको भन्दै ठगिएको कागजात देखाए । उनीहरू प्रत्येकले अधिकतम ४ लाख रुपैयाँ बुझाइसकेका छन् । मलेसियास्थित कार्यवाहक राजदूत लेखनाथ भट्टराईले बालीस्थित अस्पतालमा रहेको नकुलको शव नेपाल पठाउन पहल गरिए पनि प्रक्रिया झन्झटिलो रहेको बताए । नक्कली भिसाको अभियोगमा प्रवीन सुनार, कृष्ण सुनार, किशोर सुनार, कजन पोखरेल र हीरा गुरुङ १० दिनदेखि जकार्तास्थित अध्यागमन कारागारमा छन् । 

लेबनानमा दुई युवतीको मृत्यु झापा, भद्रपुरकी सीता पालको लेबनानको बेलुनीमा गत माघ १६ गते मृत्यु भएको छ । मृत्युको कारण खुल्न नसकेको नेपाली सहयोगी डिल्ली पौडेलले बताए । सोलुखुम्बु, कानगलकी कल्पना दमाईंको मंसिर २१ गते मृत्यु भएकोमा उनको राहदानी नक्कली भएकाले शव ल्याउन सकिएको छैन । चोरी र जालसाजीसहितका अभियोगमा अहिले लेबनानमा १२ नेपाली युवती कारागारमा रहेको पौडेलले बताए ।

 Published on: 21 February 2013 | Kantipur Post