s
विवाहको बहानामा चीन पुर्याई मानव बेचबिखन गरेको अभियोगमा एक महिलालाई प्रहरीले नियन्त्रणमा लिएको छ। उदयपुर त्रियुगा नगरपालिका-१ जोगीदह घर भएकी ३१ वर्षीय सुन्दरी राईलाई मंगलबार प्रहरीले पक्राउ गरेको हो।
चीनस्थित नेपाली राजदूतावासको समन्वयमा असार ९ गते उद्धार भई नेपाल फर्किएकी पीडितको उजुरीको आधारमा जाहेरी पश्चात् मानव बेचबिखन अनुसन्धान ब्युरो बबरमहलबाट खटिएको प्रहरीले उनलाई पक्राउ गरेको हो।
राईले पीडितलाई सामाजिक सञ्जाल मेसेन्जरमार्फत कुराकानी गरी ‘आफूले चिनियाँ नागरिकसँग विवाह गरेर चीन आएको १० वर्ष भयो, चीनमा धेरै राम्रो हुन्छ, तिमी पनि विवाह गरेर चीनमा आऊ, विवाह गर्ने केटासँग मेरो चिनजान रहेको छ, केटा धनी र राम्रो छ ’ भनी प्रलोभन देखाई पीडितलाई काठमाडौंको ठमेलमा एक चिनियाँ केटासँग भेट गराई २०८० फागुन १० गते भिजिट भिसामा चीन पुर्याएकी थिइन्।
उनले पीडितलाई १ लाख ५० हजार रूपैयाँमा चिनियाँ नागरिकलाई बेचबिखन गरेको अनुसन्धानबाट खुल्न आएको प्रहरीले जनाएको छ।
राईलाई जिल्ला अदालत काठमाडौंबाट ७ दिन म्याद थप अनुमति लिई यस सम्बन्धमा प्रहरीले थप अनुसन्धान गरिरहेको छ।
Published on: 28 June 2024 | Nagarik
GET IN TOUCH