उच्च शिक्षा अध्ययनका लागि बिदेसिनुपर्ने अवस्था अन्त्यका लागि नेपालमै गुणस्तरीय शिक्षाको व्यवस्था मिलाइनुपर्नेमा सरोकार भएकाहरूले जोड दिएका छन् । स्व. गिरिजाप्रसाद कोइरालाको स्मृतिमा ०६९ असार १८ गते स्थापना भएको जिपी कोइराला मेमोरियल कलेजको १३औँ वार्षिकोत्सव समारोहमा सहभागी शिक्षा एवं राजनीतिक क्षेत्रका व्यक्तित्वहरू त्यस्तो जोड दिएका हुन् । उनीहरूले नेपाली विद्यार्थीलाई देशमै रोक्न गुणस्तरीय शिक्षा र उपयुक्त शैक्षिक वातावरण निर्माण गर्नतर्फ त्यसतर्फ सरोकार भएका निकायको ध्यानाकर्षण गराए ।

कार्यक्रममा बागमती प्रदेश सभा सदस्य श्रीराम लामिछानेले गिरिजाप्रसाद कोइराला विश्वविद्यालय स्थापनाको तयारी पनि अन्तिम चरणमा पुगेको जानकारी दिँदै अध्ययनकै लागि बिदेसिनुपर्ने अवस्था अन्त्यका लागि आवश्यक विषय यहाँ पढ्न पाउने गरी व्यवस्था गरिने बताए । उनले सत्ता परिवर्तन जनताका लागि हुनुपर्नेमा जोड दिँदै गणेशमान सिंह, गिरिजाप्रसाद कोइरालालगायत नेताले देखाएको बाटोमा हिँड्नुपर्ने आवश्यकता औँल्याए । पढ्दै, कमाउँदै, सिक्दैजस्ता कार्यक्रमलाई पनि नेपालमा प्रभावकारी रूपमा सञ्चालन गरिनुपर्नेमा लामिछानेको जोड दिए ।

त्रिभुवन विश्वविद्यालयका रजिस्ट्रार प्रा. डा. केदारप्रसाद रिजालले नेपाली विद्यार्थी स्वदेशमै रोकेर करोडौँ रुपैयाँ नेपालमै उपयोग गरिनुपर्ने बताए । कार्यक्रममा बागमती प्रदेश सभा सदस्य विना पोखरेल पराजुली, चिकित्सा विज्ञान राष्ट्रिय प्रतिष्ठान (न्याम्स)का उपकुलपति भूपेन्द्र बस्नेत, क्याम्पस व्यवस्थापन समितिका उपाध्यक्ष न्हुच्छेनारायण श्रेष्ठ, क्याम्पस प्रमुख शिवप्रसाद अधिकारीलगायतले चाहेको विषय अध्ययन गर्न नपाई विदेश जान बाध्य हुने विद्यार्थीलाई लक्षित गरी कलेजले विषय व्यवस्थापन गर्न लागेको बताएका थिए ।

कलेजमा मानविकी, व्यवस्थापन र शिक्षाशास्त्र संकायअन्तर्गत स्नातक र स्नातकोत्तर तहको अध्ययन–अध्यापन भइरहेको छ। कलेजमा तीन हजारभन्दा बढी विद्यार्थी अध्ययन गरिरहेको प्राध्यापक राजकुमार ढुंगानाले जानकारी दिए ।

Published on: 3 July 2024 | Naya Patrika