बुधबार विभिन्न मुलुकबाट ९५६ नेपाली फर्किएका छन्।  १० अन्तर्राष्ट्रिय चार्टर्ड उडानमार्फत उनीहरू अन्तर्राष्ट्रिय त्रिभवुन विमास्थल (काठमाडौं) ओर्लिएका हुन्। 

नेपाल वायुसेवा निगम (नेपाल एयरलाइन्स) ले दुबईबाट १५० र सोही एयरलाइन्सले दोहाबाट १४८ नेपाली काठमाडौं ल्याएको हो।

यस्तै हिमालय एयरलाइन्सले दोहाबाट १५४ र क्वालालम्पुरबाट १५१ नेपालीलाई आज नेपाल ल्याएको छ । आजै कतार एयरवेजले दोहाबाट १७७ र मालिन्दो एयरले क्वालालम्पुरबाट १७६ नेपालीलाई नेपाल ल्याएको छ।  

बिहीबार पनि विभिन्न मुलुकबाट ११ अन्तर्राष्ट्रिय चार्टर्ड उडान हुनेछन्। हिमालय एयरलाइन्स चीनको टियान्जिन, अबुधाबी र दुबईबाट नेपालीको उद्धार गरी काठमाडौं ल्याउने तालिका रहेको विमानस्थलले जनाएको छ। 

त्यस्तै नेपाल एयरलाइन्सले क्वालालाम्पुर, रियाद, दोहा र दुबईबाट यात्रु ल्याउने छ। विभिन्न मुलुकबाट नेपालीको उद्धार उडानका लागि नेपालको तर्फबाट नेपाल एयरलाइन्स र हिमालय एयरलाइन्ससहित विभिन्न अन्तर्राष्ट्रिय एयरलाइन्सले चार्टर्ड उडान गरिरहेका हुन्।

Published on: 8 July 2020 | Nagarik