पीडितले रकम पाउने आशमा उजुरी फिर्ता लिएपछि बजाज ओभरसिजका म्यानेजर राम सिंहलाई वैदेशिक रोजगार विभागले छोडेको भएपनि पीडित युवाहरुको आग्रहमा गौशाला प्रहरीले सिंहलाई पुनः नियन्त्रणमा राखेको छ ।

 

आकर्षक तलबसहित कुवेत पठाउने भन्दै नेपाली युवासँग २० हजारदेखि १ लाख ६० हजार रुपैयाँसम्म असुलेर विदेश नपठाएपछि यस अघि खारेज भइसकेको म्यानपावर व्यवसायीका कथित म्यानेजर सिंहलाई युवाहरूकै पहलमा पक्राउ गरि वैदेशिक रोजगार विभाग ल्याउन लगाएका थिए । खारेज भइसकेको म्यानपावरका पूर्व सञ्चालक भने उमेश कटुवाल हुन् । उनी फरार भएका छन् । उक्त म्यानपावर खारेज हुनु अघि सो म्यानपावर जुनु राउतको नाममा रहेको थियो ।

 

करीव दुई सयको संख्यामा युवाहरू विभागको कार्यालय बुद्धनगर आएको भएपनि उजुरी भने दुई जनाले मात्र दिएका थिए । पीडितले उजुरी फिर्ता गरेपछि विभागले सिंहलाई छाडेको थियो । सिंहले म्यानपावरको कार्यालय गौशालामा नै राफसाप पार्ने भन्दै युवाहरुलाई आफ्नो कार्यालय बोलाएका थिए । साँझ अवेरसम्म पनि समस्या समाधानको टुंगो नलागेपछि पीडितहरुले शुक्रबार विहान आफूहरुको रोहबरमा छोड्ने भन्दै प्रहरीलाई जिम्मा लगाएको एक पीडितले बताए । ठगको छाला काड्छौं भन्दै दुई दिनसम्म विभाग घेरेका पीडितहरु ठग भनिएका सिंहकै पछि लागेका थिए । केही पिडितले भने सरकारी कार्यालयले नै न्याय नदिएको भन्दै आक्रोस पोख्दै आएका थिए ।

 

कुवेतको ग्लोबल एक्सन कम्पनीमा २ सय केडी करीब ५५ हजार नेपाली रुपैयाँ तलबसहित काममा पठाउनेभन्दै सिंहले ३ सय नेपाली युवाबाट पैसा असुलेको बताइएको छ । तर, सबै पीडितहरु विभाग आएका थिएनन् ।