काठमाडौं : बेलायत पठाइदिन्छु भनी १३ लाख ४६ हजार रुपैयाँ ठगी गर्ने एक जनालाई पक्राउ परेका छन्।

बेलायत पठाइदिन्छु भनी उक्त रकम ठगी गर्ने सोलुखुम्बु दूधकोसी गाउँपालिका-२ घर भई काठमाडौँ कागेश्वर मनोहरा नगरपालिका काँडाघारी बस्ने ४३ वर्षीय बालकृष्ण कार्कीलाई प्रहरीको काठमाडौं उपत्यका अपराध अनुसन्धान कार्यालय मीनभवनबाट खटिएको प्रहरी टोलीले आज पक्राउ गरेको हो।

पक्राउ कार्कीले केही व्यक्तिलाई 'वर्किङ भिसा'मा बेलायतलगायतका देशमा रोजगारीका लागि पठाइदिन्छु भन्दै पीडितबाट नगद १३ लाख ४६ हजार लिएर सम्पर्कविहीन भएपछि प्रहरीले खोजी गर्ने क्रममा आज काठमाडौं महानगरपालिका-४ धुम्बाराहीबाट पक्राउ गरेको हो।

पक्राउ उनलाई थप अनुसन्धान तथा कारवाहीका लागि वैदेशिक रोजगार विभाग बुद्धनगर पठाइएको सो कार्यालयले जनाएको छ।

Published on: 16 September 2022 | Annapurna Post