भागिश्वर लिम्बु

खानेपानी अभाव भएको भन्दै छथर गाउँका बासिन्दा बसाइँ सर्ने क्रम बढेपछि यहाँको जनसंख्या घट्दै गएको छ। यसैकारण अहिले छथर गाउँपालिकाले अन्य ठाउँबाट बसाइँ सरी आफ्नो गाउँमा आउनेलाई पाँच लाख रूपैयाँ अनुदान दिने भएको छ। गाउँको जनसंख्या वृद्धिका लागि छथर गाउँपालिकाको दोस्रो गाउँसभाले अन्यत्रबाट बसाइँ सरेर आफ्नो गाउँ आउनेलाई पुरस्कार स्वरूप एक लाख रुपैयाँसहित व्यवसाय सञ्चालन गर्न पाँच लाख रुपैयाँसम्म अुनदान उपलब्ध गराउने निर्णय गरेको हो। विभिन्न बहानामा आफ्नो गाउँ छाडेर बसाइँ सर्नेको लर्काे लागेपछि त्यसलाई रोक्न तथा अन्य ठाउँका बासिन्दालाई आफ्नो गाउँमा तान्नलाई यस्तो निर्णय गरिएको छथर गाउँपालिका अध्यक्ष सन्तोष तिगेलाले बताए।