वैदेशिक रोजगार बोर्डले वैदेशिक रोजगारीमा जान चाहने व्यक्तिले विदेशमा गर्नुपर्ने काम, त्यहाँ काम गरेवापत पाउने तलव सुविधालगायतका विषयमा जानकारी दिने गरी नयाँ वेबसाइट निर्माण गर्ने भएको छ ।

श्रम रोजगार तथा सामाजिक सुरक्षा मन्त्रालयका कम्प्युटर इन्जिनियर राजु श्रेष्ठले बोर्डले सुरु गर्न लागेको नयाँ वेबसाइटमार्फत श्रमिकले आफ्नो चाहना, रोजाइ तथा क्षमताअनुसारको काम खोज्न सक्ने र यसबाट दलालबाट ठगिने सम्भावना कम हुने बताउनुभयो ।

उहाँले वेबसाइटमार्फत आफ्नो प्रदेश वा जिल्लामा भएका वैदेशिक रोजगार व्यवसायी कम्पनी, अभिमुखीकरण तालिम केन्द्र, स्वास्थ्य परीक्षण गर्ने संस्था लगायतका बारेमा पनि जानकारी पाइने बताउनुभयो । नयाँ वेबसाइटमा वैदेशिक रोजगार विभागले प्रमाणीकरण गरेको माग मात्रै राखिने भएकाले घरमै बसेर श्रमिकले आफ्नो सीप, दक्षता र अनुभवअनुरूपको काम खोज्न सकिने जानकारी इन्जिनियर श्रेष्ठले दिनुभयो ।

Published on: 12 November 2018 | Gorkhapatra