s
रुद्र खड्का
कोरोना भाइरसको महामारीपछि ठूलो संख्यामा रोजगारी सिर्जना गर्नुपर्ने दबाबमा रहेको सरकारले अहिलेसम्म नयाँ रोजगारीका लागि भने खासै काम गर्न नसकेको पाइएको छ ।
अर्थ मन्त्रालयले आइतबार सार्वजनिक गरेको आर्थिक वर्ष २०७६/७७ को आर्थिक सर्वेक्षण अनुसार फागुन महिनासम्म एक लाख ९० हजार नौ सय १० जनालाई व्यवसायिक तथा सीप विकास तालिम दिइएको छ । तालिम लिने महिलाको संख्या ९२ हजार एक सय ८७ छ ।
त्यस्तै, सुरक्षित आप्रवासन परियोजनाबाट ७१ हजारलाई तालिम र परामर्श प्रदान गरिएको आर्थिक सर्वेक्षणमा उल्लेख छ । सीपमूलक तालिमबाट स्वरोजगार युवाको संख्या वृद्धि भई आयआर्जनमा वृद्धि हुने अपेक्षा राखिए पनि सरकारको सुस्त काम गर्ने शैलीले विदेशबाट बेरोजगार भएर फर्कनेले स्वदेशमै रोजगारी पाउने सम्भावना कम देखिएको विज्ञहरू बताउँछन् ।
हाल प्रत्येक वर्ष करिब पाँच लाख युवायुवती श्रम बजारमा प्रवेश गर्छन् । श्रम बजारमा प्रवेश गर्नेमध्ये स्वदेशमा अवसर नपाएर अधिकांश वैदेशिक रोजगारीमा जाने गर्छन् । कोरोना भाइरसको महामारी फैलिएपछि वैदेशिक रोजगारीबाट ठूलो संख्यामा नेपाली फर्कने अनुमान गरिएको छ ।
सरकारी अधिकारीहरूले वैदेशिक रोजगारीबाट फर्केकालाई स्वदेशमै रोजगारी दिने बताउने गरे पनि सीपमूलक तालिम दिइएको आँकडा हेर्दा स्वदेशमा रहेका युवालाई नै व्यवस्थापन गर्न चुनौती देखिने अनुमान गर्न थालिएको छ ।
आर्थिक सर्वेक्षणले चालु आर्थिक वर्षको फागुन महिनासम्मको तथ्यांक समेटे पनि कोरोना भाइरस फैलिएपछि युवालाई रोजगारी बढाउने खालका कार्यक्रम सञ्चालन गर्न सकेको छैन । बरु नेपाल लगायत नेपाली कामदार रहेका अधिकांश गन्तव्य मुलुकमा चैत लागेसँगै कोरोना भाइरसले महामारीको रूप लिइरहेको छ ।
Published on: 27 May 2020 | Nagarik
GET IN TOUCH