६ वर्षको उमेरमा हराएका थिए विक्रम । घर ठेगाना र अभिभावकका बारेमा जानकारी दिन नसक्दा १५ वर्षसम्म भारतमा दु:ख भोगे। 

माधव ढुंगाना

हराएको छोरालाई १५ वर्षपछि आँखैअघि देख्दा ५० वर्षे बाबु डिल्लीराम पुन बोल्नै सकेनन् । ६ वर्षीय छोरा विक्रम हराएपछि उनले चारैतिर खोजे । भेटेनन्, केही उपाय नलागेपछि घरमै बसिरहेका थिए । बुधबार विक्रमलाई देखेपछि बाबु डिल्लीराममा खुसीको सीमै थिएन । उनी त्यो खुसी शब्दमा व्यक्त गर्न सकिरहेका थिएनन् । छोरालाई जिम्मा लिएको औपचारिक कागज गर्न जिल्ला प्रहरी परिसरमा पुगेका उनले भने, ‘जताततै खोज्दा खोज्दा फेला नपारेपछि आस मारिसकेका थियौं ।’ छेउमा विक्रमकी आमा रञ्जिता उसै गरी खुसीका आँसु झारिरहेकी थिइन् ।