सरकारले ओमान र युएईसँग श्रम समझदारी (एमओयू)को मस्यौदा टुंगो लगाउन पठाएको प्राविधिक टोलीले ओमानको श्रम तथा मानव संसाधन मन्त्रालयमा छलफल गरेको छ ।
सम्झौताका लागि ओमानले दुई महिनाअघि पठाएको खाकामा नेपालले आफ्नो बिषय राखेर प्रस्ताव तयार गरेको थियो । सोही प्रस्तावमा राखिएका बिषयमा आइतबार दुईपक्षीय छलफल भइरहेको हो ।
सोमबार पनि छलफलको गर्ने र मस्यौदा अन्तिम रुप दिइनेछ । प्रस्तावमा दुवैदेश सहमत भए मन्त्रीस्तरिय भ्रमण गराएर सम्झौतामा हस्ताक्षर गरिने ओमानका लागि नेपाली राजदुत शर्मिला पराजुली ढकालले बताइन् ।
छलफलमा श्रम, रोजगार तथा सामाजिक सुरक्षा मन्त्रालयलबाट आएका सहसचिव रामप्रसाद घिमिरेको नेतृत्वको पाँच सदस्यीय प्राविधिक टोलीसँगै दुतावासकी नियोग उपप्रमुख रोजिना ताम्राकार तथा श्रम सहचारी कृष्णकुमारी गौली पनि सहभागी भएका थिए ।
ओमनको छलफलपछि टोली मंगलबार युएई आउने कार्यतालिका छ । बुधबार र बिहीबार युएईसँग छलफल गर्ने कार्यक्रम तय भएको छ ।
नेपालले यसअघि नै युएईसँग एमओयू गरेको छ । तर, त्यो कामदारको हितमा नभएको र त्यसलाई अन्तर्राष्ट्रियरुपमा स्थापित श्रम अधिकारका सवालहरुलाई परिमार्जन गर्ने गरी टोलीले छलफल गर्ने जनाइएको छ ।
यी राष्ट्रमा द्धिपक्षीय श्रम सम्झौता नहुँदा मुख्यत घरेलु महिला कामदारले समस्या भोग्दै आएका छन् । यदि यी देशसँग श्रम सम्झौता हुन सकेमा नेपाली कामदारले पाउने सेवासुविधामा समेत थप सहजता हुने सरोकारवालाहरुको धारणा छ ।
