१७ कात्तिक, काठमाडौं । प्रहरीको अपराध अनुसन्धान महाशाखा, टेकुले लावस पठाइदिन्छु भनेर ठगी गरेको आरोपमा एक दम्पत्तिलाई पक्राउ गरेको छ । पक्राउ पर्नेमा हेटौंडाका विजय थिङ लामा र सजना थिङ लामा छन् ।
महाशाखाका प्रमुख एसएसपी सहकुलबहादुर थापाका अनुसार उनीहरुले वैदेशिक रोजगारीको सिलसिलामा वर्किङ भिषामा आकर्षक तलब पाउने गरी लावस पठाइदिन्छु भनेर प्रलोभन देखाइ ठगी गरेका थिए ।
विभिन्न प्रलोभन देखाएर विश्वास दिलाउँदै लामाद्वयले २४ लाख २० हजार रुपैयाँ ठगी गरेको अभियोग छ । उनीहरुले रकम लिएर लावस र दिल्लीसम्म समेत केही व्यक्तिलाई पुर्याएर अलपत्र पारेको जनाइएको छ ।
उनीहरुलाई पक्राउ गरी थप कारबाहीका लागि प्रहरी परिसर, लतिलपुर पठाइएको छ ।
