सुन्दर खनाल
म्यानपावर कम्पनीसँग घूस लिन खोजेको आरोपमा अनुसन्धानमा तानिएका इजिप्टका लागि कार्यवाहक नेपाली राजदूत कौशलकिशोर रायलाई उन्मुक्ति दिलाउन राजनीतिक कसरत सुरु भएको छ ।
राजनीतिक दबाबकै कारण परराष्ट्र मन्त्रालयका उपसचिव लीलादेवी गड्तौलाको संयोजकत्वमा गठित छानबिन समितिको प्रतिवेदनमाथि साता बित्दा पनि कुनै कारबाही अगाडि बढाइएको छैन ।
मन्त्रालयका प्रवक्ता दीपक धितालले प्रतिवेदन अनुसन्धानको चरणमा भएकाले टिप्पणी गर्न नमिल्ने बताए । उच्च स्रोतका अनुसार दबाबका कारण मन्त्रालय नेतृत्व रायलाई कारबाही नहुने गरी अनुसन्धान प्रतिवेदनलाई अथ्र्याउने वा त्यत्तिकै थन्काउने मनस्थितिमा पुगेको छ । विदेशस्थित नेपाली नियोग नेतृृत्व गरेको व्यक्ति गम्भीर आरोपमा मुछिएको र प्रतिवेदनले समेत उनलाई दोषी देखाइसकेको कारण रायको फाइल अख्तियार दुरुपयोग अनुसन्धान आयोग पठाउनुपर्ने अधिकारीहरूको धारणा छ । ‘मन्त्रालयकै प्रतिवेदनले चाहिँ दोषी भनेको छ तर अहिलेसम्म निलम्बनको निर्णयसमेत गरिएको छैन,’ अधिकारीहरूले भने ।
तीन वर्षअघि लोक सेवा आयोगको खुला प्रतिस्पर्धाबाट परराष्ट्र सेवाअन्तर्गत शाखा अधिकृत बनेका रायले छानबिन समितिलाई बयान दिने क्रममा आफ्नो कमजोरीसमेत स्वीकारेको बताइन्छ ।
अफ्रिकी मुलुक इजिप्टको एक पानी जहाज कम्पनीबाट ६ सय जना नेपाली कामदार माग भएपछि एक म्यानपावर कम्पनीले आपूर्तिका लागि पहल गर्दा रायले घूस मागेको आरोप छ । नियमानुसार सम्बन्धित देशमा रहेको नेपाली नियोगले कामदार आपूर्ति गर्ने नेपाली कम्पनीको हैसियत हेरी आपूर्ति प्रस्ताव स्वीकृत गर्नुपर्ने हुन्छ ।
रायले त्यही कामदार आपूर्तिका लागि प्रयासरत अर्को नेपाली कम्पनीसँग साँठगाँठ राखेको, त्यसैको प्रस्ताव स्वीकृत गरेको र त्यहीबीचमा उजुरी परेर मन्त्रालयले स्पष्टीकरण माग्दा १५ दिन आलटाल गरेको आरोप छ । उनले एमपीएको परीक्षा दिन भनेर स्वदेश फर्केका बेला राजधानीको एक तारे होटलमा म्यानपावर कम्पनीलाई बोलाई प्रतिकामदार बराबर ६ सय अमेरिकी डलरका दरले कुल झन्डै ३२ लाख रुपैयाँ बराबर घूस मागेको उजुरीमा उल्लेख छ ।
राय मधेसका एक प्रभावशाली कांग्रेसी नेताका ज्वाइँ हुन् । विदेशस्थित नेपाली नियोगका प्रमुखहरू अनेक विवादमा परेका भए पनि ठाडै घूसै मागेको चाहिँ यो पहिलो घटना हो ।
