s
Year of Publication: 16 August 2018 | Kantipur
Publication Type: NEWS
Published by: CESLAM
सन् २०२२ को लागि कतारमा हुन गइरहेको विश्वकप रंगशालाको लागि निर्माणधीन अल वक्रा रंगशालामा मोरङका २३ वर्षीय तेजनारायण थारुको मंगलबार बिहान मृत्यु भएको छ ।कतारस्थित नेपाली दूतावासका अनुसार थारुको रंगशालाभित्रै काम गर्नेक्रममा मृत्यु भएको हो ।
उनी स्काफफोल्डिङको काम गर्थे । ‘घटनाको अनुसन्धान भइरहेको सूचना हामीलाई दिइएको छ,’ दूतावासका एक अधिकारीले कान्तिपुरलाई भने,‘शव पठाउनुअघि पूर्ण विवरण आउनेछ ।’ थारु शव पठाउने प्रक्रिया भइरहेको छ ।
विश्वकप रंगशाला निर्माणको सम्पूर्ण जिम्मेवारी रहेको ‘द सुप्रिप कमिटी फर डिलिभरी एण्ड लिगेसीद्वारा जारी विज्ञप्तिमा थारुको आयोजनाभित्र काम गर्नेक्रममा मृत्यु भएको उल्लेख छ । ‘घटनाबारे मृतकका नजिकको व्यक्ति, कतार र नेपाली निकायलाई खबर भइसकेको छ,’ विज्ञप्तिमा भनिएको छ, ‘घटनाबारे थप अनुसन्धान सुरु भइसकेको छ ।’
डेड वर्षअघि अल वक्रा रंगशालामा कार्यरत सुखीपुर–४, सिराहाका २९ वर्षीय अनिलकुमार पासमानको मृत्यु भएको थियो । सुप्रिम कमिटीले हालसम्म यो रंगशालामा काम गर्नेक्रममा दुई जनामात्रै नेपालीको ज्यान गएको जनाएको छ ।
४० हजार सीट क्षमता भएको अल वक्रा आउँदो डिसेम्बरसम्म निर्माण सम्पन्न गर्ने लक्ष्य छ । यतिखेर छाना छाउने काम सकिन लागेको छ । विश्वकप सकिएपछि २० हजार क्षमतामा झारेर बाँकी २० हजार क्षमताको रंगशाला अरु देशलाई दिइने योजना छ ।
अल वक्रा कतारको सबैभन्दा परम्परागत सानो सहर हो । यही सहरभित्र निर्माणाधीन अल वक्रा रंगशालाबाट हमाद अन्तर्राष्ट्रिय विमानस्थलसम्मको दूरी झन्डै १५ किमि जति छ । रंगशालाको निर्माण ठेक्का मिडम्याक कम्पनी र पोर्र कतारले पाएका हुन् । कतारमा मिडम्याकमा कम्तीमा ५ हजार नेपालीलाई रोजगारी दिने कम्पनी हो । यो रंगशाला बनाउन कामदारले २.५ मिलियन घण्टा काम हुने सुप्रिप कमिटिको भनाइ छ ।
Published on: 16 August 2018 | Kantipur
GET IN TOUCH