‘मलेसिया जानु भनेको अमेरिका सरह हो,’ विदेश जान लागेका कामदारले एक लाख रुपैयाँ बढी किन तिर्ने भन्ने प्रश्नमा म्यानपावर व्यवसायीले दिएको जवाफ हो यो । यसले शुन्य लागतमा कामदार पठाउने सरकारी नीतिलाई व्यवसायीले कसरी मिच्दैछन् भन्ने प्रष्ट पारेको छ । वैदेशिक रोजगार विभागका अनुसार गुल्मी रेसुंगाका अनिल बिक, सन्दीप बिक र दीपकबहादुर सुनारसहित सुनसरी बराह नगरपालिकाका सन्तोष बिष्ट मलेसिया जाँदै थिए ।

मलेसियाको अबिबा प्लाष्टिक कम्पनीमा जानका महाराजगञ्ज स्थित लाइफ इन्टरनेशनल ओभरसिजका जनसम्पर्क अधिकृत दानबहादुर सोमैलाई सम्पर्क गरे । तर, सुरुमै शर्त तेस्र्याइयो, मागेजति रकम दिनुपर्छ । उनीहरुले कम्तिमा प्रतिव्यक्ति १ लाखभित्रै पठाउन निकै अनुनय-विनय गरे । तर, सोमैको अडान रह्यो, ‘मलेसिया जानु भनेको अमेरिका जानु जस्तै हो, १ लाख ३५ हजारमा एक पैसा कम हुन्न ।’

यो मलेसियन कम्पनीबाट नेपाल र मलेशियाबीचको पछिल्लो श्रम सम्झौता बमोजिमको फ्रि भिषा फ्रि टिकट अन्तर्गतको मागपत्र आएको थियो । उक्त कम्पनीमा ५० जना कामदारको माग भएकोमा चारसहित ३६ जनाले श्रम स्वीकृति लिएका थिए । तर, बुधबार कामदारसँग ४ लाख ५० हजार लिँदै गरेको अवस्थामा रंगेहात विभागको टोलीले फेला परेको विभागका महानिर्देशक भीष्मकुमार भुसालले बताए । रोचक त के छ भने कामदारसँग पैसा लाइफ इन्टरनेशनलमा उठाइँदै थियो भने उनीहरुको श्रम स्वीकृति अर्कै म्यानपावरविन रिक्रुटमेन्टबाट निकालिएको थियो ।

Published on: 19 December 2019 | Onlinekhabar