s
Year of Publication: 8 February 2013 | Kantipur
Publication Type: NEWS
Published by: CESLAM
देवेन्द्र भट्टराई
खाडीको ओमानमा रहेको कम्पनीमा क्लिनर काममा जाने भन्दै श्रम स्वीकृति दिइएका पाँच युवालाई कुवेतको एक मजरा(खेतीपाती) काममा खटाइएको प्रमाण पाएपछि कुवेतस्थित दुतावासले पीडित कामदारलाई नेपाल फिर्ता पठाएको छ ।
युथ म्यानपावर प्राइभेट लिमिटेडबाट कागजात प्रकृया मिलाएर गत डिसेम्बर २५ मा कुवेत गएका थिए । वैदेशिक रोजगार बिभागले उनीहरुलाई दिएको श्रम स्वीकृतिमा ओमानस्थित अबुजमाल ट्रेडिङ कम्पनीमा क्लिनर काममा जान लागेको जनाइएको छ ।
मानवतस्करीको जालोमा पर्नेहरुमा दाङका मनोज नेपाली र रमेश चौधरी, सिन्धुलीका काले राई, धादिङका महबुब मियाँ र नुवाकोटका राजाराम काडेल छन् । कुवेतको नाजिम अब्दुल्लाह बुडास्टुर नामको मजरामा काम गरिरहेका यी कामदार उद्धारको आग्रह गर्दै दुतावासमा आश्रति भएका थिए । 'पीडितहरु बैदेशिक रोजगारीको क्रममा मानव तस्करीको फन्दामा परेको पुष्टी भएको छ, यो पुष्टीसहित सम्बद्ध म्यानपावरलाई हदैसम्मको कारवाही र पीडितलाई क्षतीपुर्तीसहितको पत्र पठाएका छौं,'कुवेतस्थित श्रम सहचारी सृजना तिवारीले भनिन् । पीडित पाँच युवा शुक्रबार साँझको एयर अरेबिया उडानबाट काठमाडौं फिर्दैछन् ।
वैदेशिक रोजगार बिभागका महानिर्देशक पूर्णचन्द्र भट्टराईले ओमान लैजाने श्रम स्वीकृतिमा कुवेत पुर्याइएको घटनामा सम्बद्ध म्यानपावरलाई ठगी र मानवतस्करीको दोहोरो कारवाही अघि बढाउने प्रतिबद्धता जनाए ।
Published on: 8 February 2013 | Kantipur
GET IN TOUCH