देवेन्द्र सम्बाहाम्फे

कोरिया सरकारले यहाँ कार्यरत मजदुरहरूको ६.१ प्रतिशतले तलब वृद्धि गरेको छ । न्यूनतम ज्याला निर्धारण समितिले शुक्रबार उक्त निर्णय गरेको हो । आउँदो जनवरीबाट लागू हुने परिवर्तित नियम अनुसार यहाँका मजदुरहरूले प्रतिघन्टा ज्याला ४ हजार ८ सय ६० वन पाउने छन् ।

बढ्दो महँगीका कारण जीवनयापनमा कठिनाइ भएकाले प्रतिघन्टाको ज्याला ५ हजार ६ सय वन हुनुपर्ने माग राख्दै यहाँका १६ मजदुर संगठनले गत सातादेखि सोल हाकुदोङस्थित न्यूनतम ज्याला निर्धारण समितिको कार्यलयमा धर्ना दिएका थिए । मजदुरहरूको मागलाई सम्बोधन गर्न सरकारले शुक्रबार ज्याला निर्धारण समितिको बैठक आमन्त्रण गरेको थियो ।

२७ सदस्यीय समितिका दस जनाले ६.१ प्रतिशत वृद्धि गर्ने पक्षमा मतदान गरेका थिए । आठ जनाले २२ प्रतिशत वृद्धि गर्न माग गरेका थिए भने ९ जना तटस्थ बसेका थए । मतदान प्रक्रिया अपनाइए पनि आपसी सहमतिद्वारा सरकारले राति अबेर ६.१ प्रतिशतले वृद्धि भएको घोषणा गरेको थियो । हाल प्रतिघन्टा ज्याला ४ हजार ५ सय ८० वन छ । मझौला तथा साना उधोगहरूलाई कठिनाइ हुने भन्दै सरकारले गत मेमा तलब वृद्धि नगर्ने घोषणा गरेको थियो ।

कोरियाको श्रम नियम अनुसार प्रतिमहिना २ सय ९ घन्टा न्यूनतम कार्यअवधि भएकाले सन् २०१३ बाट न्यूनतम तलब १० लाख १५ हजार वन -करिब ७१ हजार रुपैयाँ) हुने छ ।

परिवर्तित नियमले करिब २ करोड ५८ हजार मजदुरलाई फइदा पुग्ने छ । १५ देशका  युवाहरूको आकर्षक रोजगारी स्थल बन्दै गएको कोरियामा प्रत्येक वर्षको तलब वृद्धिले नेपाली श्रमिक अझ उत्साहित बनेका छन् ।

Published on: 1 July 2012 | Kantipur